اسرائیلی شہر حیفا کے فوجی اڈے پر حزب اللہ کا ایک اور ڈرون حملہ

لبنانی مزاحمتی گروپ حزب اللہ نے بدھ کے روز بھی اسرائیلی شہر حیفا پر ڈرون حملے کیے ہیں۔ اس امر کا اظہار حزب اللہ کی طرف سے باضابطہ طور پر کیا گیا ہے۔ بتایا گیا ہے کہ بارود سے بھرے یہ ڈرونز حزب اللہ کے مقتول رہنما حسن نصراللہ کے نام سے منسوب کر کے اسرائیلی شہر پر حملے کے لیے بھیجے گئے۔

اس بیان میں یہ بھی کہا گیا ہے کہ ان ڈرونز کا ہدف حیفا شہر میں قائم اسرائیلی فوجی اڈہ تھا۔ یہ اسرائیلی فوجی اڈہ حیفا شہر کے جنوب میں واقع ہے۔ حزب اللہ کو گزشتہ کئی دنوں سے اسرائیل کے جدید ترین فضائی دفاعی نظام کے ہوتے ہوئے اس سلسلے میں کامیابی مل رہی ہے کہ اس کے میزائل اور ڈرون اسرائیل کے اندر تک پہنچ رہے ہیں۔

واضح رہے اسرائیل کے پاس اس وقت چار قسم کے دفاعی نظام موجود ہیں لیکن یہ سبھی ہونے کے باوجود حزب اللہ کے راکٹ اسرائیل کے اندر تک پہنچ رہے ہیں۔ امریکہ نے اپنا جدید ترین دفاعی نظام ‘ تھاڈ’ حال ہی میں اپنے ماہر فوجیوں کے دستے کے ساتھ اسرائیل بھیجا ہے۔

لبنان کی ایرانی حمایت یافتہ حزب اللہ کی طرف سے یہ بھی کہا گیا ہے کہ یہ حملہ بھی اسرائیل کے پچھلے ماہ سے جاری بمبار حملوں کے جواب میں ہیں۔