پیپلز پارٹی کے سینئر رہنما اعتزاز احسن کا کہا ہے کہ میں پیپلز پارٹی میں ہوں ، عمران خان میرا دوست ہے۔
اعتزاز احسن کا لاہور میں پریس کانفرنس کرتے ہوئے کہنا ہے کہ 50 سال سے عمران خان اور میرے گھر کی دیوار سانجھی ہے ، پیپلز پارٹی میری فیملی ہے۔سیاسی اختلاف پر کسی کو برا بھلا کہنے یا رانا ثناء اللّٰہ کی زبان استعمال کرنے پر یقین نہیں رکھتا، وکلاء تحریک کے دوران بھی پیپلز پارٹی کی بجائے وکلاء قیادت چھوڑنے کو تیار تھا۔
اعتزاز احسن کا کہنا تھا کہ فیک خبریں چل رہی ہیں کہ اعتزاز احسن بنی گالہ میں بیٹھا ہے ، تحریکِ انصاف جوائن کرنے والا ہے ، میرا پیپلز پارٹی چھوڑنے یا کسی اور جماعت میں شمولیت کا کوئی امکان نہیں ہے۔
انہوں نے کہا کہ پارٹی کے لوگوں سے تعلقات شائستہ تھے، شائستہ ہی رہنے چاہئیں، ناشائستگی نہیں آنی چاہیے، عمران خان سرگودھا میں ہیں، میں لاہور میں ہوں، میرا کسی اور جماعت میں شمولیت کا کوئی امکان نہیں، میرا پیپلز پارٹی کو چھوڑنے کا بھی کوئی امکان نہیں۔ پیپلز پارٹی کے سینئر رہنما کا کہنا ہے کہ پیپلز پارٹی کو چھوڑنے کے لیے مجھے پرویز مشرف کی جانب سے پیغام 15 سال پہلے ملا، پیپلز پارٹی میرا خاندان ہے، اختلافِ رائے ہماری جماعت میں ہوتا ہے، پیپلز پارٹی جمہوری جماعت ہے، یہ مذہب کو سیاست کے لیے استعمال نہیں کرتی۔
