تازہ ترینخبریںفن اور فنکار

گریمی ایوارڈ جیتنے والی یہ پہلی پاکستانی خاتون کون ہے؟

پاکستانی نژاد امریکی پاپ گلوکارہ 37 سالہ عروج آفتاب نے دنیائے موسیقی کا اعلیٰ ترین ایوارڈ ’گریمی‘ جیت کر نئی تاریخ رقم کردی۔

عروج آفتاب اب تک پاکستان کی وہ پہلی گلوکارہ بن گئیں، جنہوں نے ’گریمی‘ ایوارڈ جیتا، انہوں نے ’بیسٹ گلوبل پرفارمنس‘ کا ایوارڈ اپنے نام کیا۔

خبر رساں ادارے ’ایسوسی ایٹڈ پریس‘ (اے پی) کے مطابق 64 ویں گریمی ایوارڈز کی تقریب امریکی شہر لاس اینجلس میں منعقد ہوئی، جس میں تمام 86 کیٹیگریز کے فاتحین کا اعلان کیا گیا۔

تقریب کے دوران تمام فاتحین کو ایوارڈز سے نوازا گیا، امریکی ریپر، گلوکار 35 سالہ جان باٹسٹ نے ریکارڈ 5 ایوارڈز اپنے نام کیے۔

جان پاٹسٹ کو سب سے زیادہ 11 نامزدگیاں ملی تھیں، جن میں سے انہوں نے 5 ایوارڈ اپنے نام کیے، وہ ’ایلبم آف دی ایئر‘ کا بڑا ایوارڈ لینے میں بھی کامیاب گئے۔

دوسرا بڑا ایوارڈ ’ریکارڈ آف دی ایئر‘ سلک سونک نے جیتا جب کہ ’بیسٹ نیو آرٹسٹ‘ کا ایوارڈ اولیویا ردریگو لے اڑیں، انہوں نے بھی تین ایوارڈ جیتے۔

گلوکارہ ڈوجا کیٹ اور لیڈی گاگا کے حصے میں بھی ایک ایک ایوارڈ آیا جب کہ عروج آفتاب پہلی پاکستانی گلوکارہ بنیں جنہوں نے موسیقی کا اعلیٰ ترین ایوارڈ جیتا۔

عروج آفتاب کو ان کے معروف گانے ’محبت‘ پر گریمی ایوارڈ ملا جو کہ 2020 کی سابق امریکی صدر براک اوباما کی پسندیدہ گانوں کی فہرست میں بھی شامل تھا۔

گریمی ایوارڈز کی تقریب ابتدائی طور پر جنوری 2022 میں ہونی تھی مگر کورونا کی وبا کے باعث اس کی تقریب دیر سے کی گئی۔

 

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button