اوورسیز پاکستانیز کنونشن اسلام آباد میں جاری، وزیراعظم کی ہدایت پراوورسیز پاکستانیز کو سٹیٹ گیسٹ کا درجہ دے دیا گیا

وفاقی دارالحکومت میں اوورسیز پاکستانیوں کے لیے پہلا کنونشن سینٹر اسلام آباد میں دو روزہ ”اوورسیز پاکستانیز کنونشن“ جاری ہے، جس میں دنیا کے 80 سے زائد ممالک سے آئے ہوئے 1500 سے زائد اوورسیز پاکستانی شریک ہیں۔ شرکاء کو ریاستی مہمان کا درجہ دیا گیا ہے۔

تقریب کا آغاز تلاوت کلام پاک، قومی ترانے اور ”پاکستان زندہ باد“ کے فلک شگاف نعروں سے ہوا۔ کنونشن میں اسپیکر قومی اسمبلی ایاز صادق، گورنر خیبرپختونخوا فیصل کریم کنڈی، وفاقی وزراء، بیرون ملک تعینات پاکستانی سفراء اور مختلف شعبوں سے وابستہ اہم شخصیات بھی شریک ہیں۔

اوورسیز پاکستانیز فاؤنڈیشن کے چیئرمین سید قمر رضا نے افتتاحی تقریب سے خطاب کرتے ہوئے بتایا کہ وزیراعظم شہباز شریف کنونشن سے خطاب کے دوران اوورسیز پاکستانیوں کے لیے خصوصی پیکج کا اعلان کریں گے۔
آج آرمی چیف جنرل عاصم منیر کنونشن کے شرکاء کو عشائیہ دیں گے جبکہ کل وزیراعظم شہباز شریف بھی شرکاء کے اعزاز میں عشائیہ دیں گے۔ آرمی چیف اور وزیراعظم کل کنونشن سے خطاب بھی کریں گے۔

اس اہم موقع پر اوورسیز پاکستانیوں کی خدمات اور ملکی معیشت میں ان کے کردار کو سراہا جا رہا ہے، جب کہ کنونشن کے ذریعے ان کے مسائل اور تجاویز کو بھی سنا جا رہا ہے۔

پاکستان پہنچنے والے اوورسیز کا کہنا ہے کہ اوورسیزپاکستانی حکومت وقت کے ساتھ کھڑی ہے، امید کرتے ہیں حکومتی اقدامات اور پالیسی سے اوور سیزپاکستانیوں کےلیے سرمایہ کاری کے نئے دروازے کھلیں گے۔

ان کا مزید کہنا تھا کہ اوورسیزپاکستانیوں نے اس عزم کا بھی اظہار کیا کہ پاکستانی بہتری کے لیے جو ہوسکا ہم کریں گے۔
وزیراطلاعات عطا تارڑ نے گفتگو کرتے ہوئے کہا ہے کہ پاکستان میں اوورسیزپاکستانی کنونشن ہورہا ہے، کنونشن کا مقصد اوورسیزپاکستانیوں کی خدمات کوسراہنا ہے۔

انہوں نے کہا کہ اوورسیزپاکستانی دنیا میں پاکستان کا نام روشن کر رہے ہیں، اوورسیزپاکستانی ہرسال اربوں ڈالرکی ترسیلات زربھجواتے ہیں۔

عطا تارڑ نے مزید کہا کہ اوورسیزپاکستانی ہماری شان اورسروں کاتاج ہیں، اوورسیزپاکستانیوں کاملکی معیشت کی بہتری میں اہم کردارہے، اوورسی کا ملکی ترقی میں اہم کردارہے۔