لاہور، پنجاب یونیورسٹی میں جمعیت کے زیراہتمام ’’حیا واک‘‘ کا انعقاد
لاہور کی تاریخی جامعہ پنجاب میں اسلامی جمعیت طلبہ کی جانب سے حیا واک کا اہتمام کیا گیا، جس میں طلبہ و طالبات کی بڑی تعداد نے شرکت کی۔ واک کی قیادت سابق رکن پنجاب اسمبلی سمیعہ راحیل قاضی نے کی۔ حیا واک میں نوجوان نسل میں حیا اور اسلامی اقدار کے فروغ کا پیغام دیا گیا۔ اسلامی جمیعت طلبہ کے زیراہتمام حیا واک کے شرکاء سے احسن فرید، صہیب عامر فخری سمیت دیگر رہنماوں نے خطاب کیا۔ جنرل سیکرٹری اسلامی جمیعت طلبہ جامعہ پنجاب کا کہنا تھا کہ حیا ہماری پہچان ہے، اسلام نے عورت کو عزت دی ہے، جبکہ نام نہاد مغربی قوتیں عورت کو سر بازار لا کر اسے ’’شو پیس‘‘ بنا دیا ہے۔ آج اسلام دشمن قوتوں کا پہلا نشانہ تعلیمی ادارے ہیں، جہاں بے حیاتی کو فروغ دے کر ہماری بچیوں کو گمراہ کرنے کا منصوبہ شروع کیا گیا ہے، مگر اسلامی جعمیت اس اسلام دشمن قوتوں کے سامنے ایک مضبوط ڈھال ہے۔
سابق ممبر پنجاب اسمبلی سمیعہ راحیل قاضی نے خطاب کرتے ہوئے کہا کہ معاشرے میں حیا کی ترویج وقت کی اہم ضرورت ہے، مغرب مسلم خواتین کی گمراہی کے نت نئے طریقے نکال رہا ہے، کبھی ویلنٹائن ڈے کے نام سے گمراہ کرتا ہے تو کبھی مخلوط محافل میں عورت کو اہمیت دے کر اسے راغب کرتا ہے۔ سمیعہ راحیل قاضی نے مزید کہا کہ اسلامی جمیعت طلبہ کے نوجوانوں کی وجہ سے جامعہ کی طالبات محفوظ ہیں، طالبات کو تحفظ کی فراہمی کا یہ سلسلہ برقرار رہے گا۔ احسن فرید نے کہا کہ نوجوان نسل کو مغربی یلغار سے بچانے کیلئے کردار ادا کرنا ہوگا، حیا واک میں شریک طلبہ کا جوش و خروش دیدنی تھا، واک کے شرکاء نے اسلامی روایات کے تحفظ کا عزم کیا
