لاہور ۔ 1929( حصہ دوم)

احمد نوید
تقسیم لاہور کے پرامن ماحول کے لیے ایک زبردست جھٹکا تھی، جو دوسری جنگ عظیم کے خاتمے کے قریب مزید بگڑ گئی۔ 1942ء میں گاندھی جی کی ’’ ہندوستان چھوڑ دو‘‘ تحریک نے ہندوستان بھر میں جوش و خروش کو جنم دیا۔ میں بھی لاہور کی گلیوں میں مارچ میں شامل ہوئی اور گورنر ہائوس کے سامنے ’’ وندے ماترم‘‘ اور ’’ جنا گنا منا‘‘ گاتی رہی، جو راج کے خلاف احتجاج کی علامت تھے۔
کانگریس، مسلم لیگ، اور برطانوی حکومت کے درمیان مذاکرات ناکام ہو گئے۔ نتیجتاً، ہندوستان کی آزادی کے ساتھ ساتھ دو مختلف ریاستوں، ہندوستان اور پاکستان، کے قیام کی آواز بلند ہوئی۔ جناحؒ نے متحدہ ہندوستان کی حمایت کی تھی، بشرطیکہ انہیں ملک کا پہلا وزیر اعظم بنایا جائے۔ گاندھی جی ان کی شرط ماننے کے لیے تیار تھے، لیکن نہرو، جناحؒ کی طرح، اسے اپنی حیثیت کے لیے توہین سمجھتے تھے۔
جب تقسیم کا فیصلہ ہوا تو ہندو اور مسلمان برادریوں کے درمیان تعلقات ٹوٹ گئے۔ دونوں قوموں کے بیچ دیرینہ ہم آہنگی ختم ہو گئی۔ سب سے بڑا المیہ یہ تھا کہ اس وقت کے عوام کو معلوم نہیں تھا کہ جناحؒ کینسر کے باعث موت کے قریب تھے، اور پاکستان کا قیام عمل میں آنے کے ایک سال بعد ہی ان کا انتقال ہو گیا۔
اگست 1947ء میں ہندوستان کی تقسیم نے لاہور میں قتل عام کو جنم دیا۔ لوٹ مار اور قتل و غارت گری عام ہو گئی۔ ہندوئوں کی املاک کو آگ لگا دی گئی۔ یہی منظر ہندوستان کے ان علاقوں میں بھی تھا، جہاں مسلمان رہائش پذیر تھے۔ لاکھوں لوگ یا تو قتل کر دئیے گئے یا راتوں رات بے گھر ہو گئے۔
یہ انسانی تاریخ میں بے مثال انتشار اور افراتفری تھی، جہاں دونوں ملکوں کی آبادی کو ناقابل بیان مصائب کا سامنا کرنا پڑا۔
اگست1947ء میں ہندوستان کی تقسیم کے ساتھ ہی لاہور میں ہندوئوں کے قتلِ عام کا سلسلہ شروع ہوا۔ لوٹ مار، قتل و غارت اور ہندو جائیدادوں کو جلانا معمول بن گیا۔ ہندوستان میں بھی مسلمانوں کے ساتھ ایسا ہی سلوک ہوا۔ یہ انسانی تاریخ کا ایسا دلخراش المیہ تھا جس کی نظیر نہیں ملتی۔ لاکھوں افراد قتل یا بے گھر ہو گئے، اور ان گنت افراد ذہنی و جسمانی طور پر معذور ہو گئے۔ عورتوں کو بے حرمتی کا نشانہ بنایا گیا، اور ان کی لاشیں تک بربریت سے مسخ کر دی گئیں۔
میرے خاندان نے لاہور میں سب کچھ کھو دیا، لیکن خوش قسمتی سے ہم زندہ تھے کیونکہ ہم اس وقت والد کے ڈلہوزی میں واقع سمر ریزورٹ میں موجود تھے۔ تاہم، میرا بڑا بھائی لاہور میں رہ گیا تھا۔ جب اس نے ہندو گھروں کو جلتا اور قتل ہوتے دیکھا، تو اس نے ممتاز دولتانہ سے دہلی کے لیے پرواز لینے کی درخواست کی۔ اس کی درخواست مسترد کر دی گئی، لیکن خوش قسمتی سے وہ کسی طرح ایئرپورٹ پہنچنے میں کامیاب ہو گیا۔
ڈلہوزی ہماچل پردیش میں بھی کچھ مسلمان گھروں کو لوٹ کر جلا دیا گیا۔ راستے میں، گجر قبائل کے افراد، جو سالہا سال ڈلہوزی اور چمبہ میں مویشیوں کی فراہمی کرتے تھے، قتل یا زخمی حالت میں سڑکوں پر پڑے ملے۔ میں ابتدا میں شدید صدمے اور ناقابل یقین کیفیت کا شکار ہو گئی۔ میری بڑی بہن نرمل آنند نے ہندوئوں کو اس قتل و غارت سے روکنے کا فیصلہ کیا۔ ہم نے اپنے مسلمان دوستوں کے گھروں ( بشمول دولتانہ خاندان کے گھر) پر قبضہ کر لیا اور فسادیوں سے کہا کہ ہمیں بھی ان گھروں کے ساتھ جلا دیں۔ کسی کو ہمت نہ ہوئی۔ ہماری سب سے بڑی حامی مرادولا سارا بھائی تھیں، جو ہماری والدہ اور نہرو کی قریبی دوست تھیں۔ وہ ہمیں اپنی جیپ میں ڈلہوزی اور چمبہ لے گئیں تاکہ فسادیوں کو روکنے کی کوشش کریں۔
پہاڑوں میں شدید سردی کی وجہ سے ہمیں میدانوں کی طرف آنا پڑا، حالانکہ ہمارے پاس میدانوں میں واپس آنے کے لیے کوئی گھر نہیں تھا۔ میں اپنی نانی کے ساتھ فوجی قافلے میں دہلی پہنچی۔ راستے میں پٹھان کوٹ سے پنجاب کے میدانوں تک ہر طرف لاشیں اور زخمی لوگ نظر آ رہے تھے۔
یہ مناظر دل دہلا دینے والے تھے ۔ میرے دل میں گہرے زخم چھوڑ گئے۔ اس وقت میرا دل سوال کر رہا تھا۔’’ آزادی کی یہ قیمت، اور کس مقصد کے لیے؟‘‘۔ گاندھی جی کی بصیرت کی یاد آتی ہے، جنہوں نے نہرو کو سمجھانے کی کوشش کی تھی کہ جناحؒ کو متحدہ ہندوستان کا پہلا وزیراعظم بننے دیں۔ لیکن نہرو نے اپنی تقریر ’’ قسمت کے ساتھ وعدہ‘‘ پر توجہ دی، جبکہ گاندھی نے نوآکھالی کے فسادات کو روکنے کی کوشش بھی کی۔ تقسیم کے بعد گاندھی جی نے سیاست میں پسپائی اختیار کر لی، کیونکہ وہ تقسیم کے بعد کے نتائج دیکھ کر دل شکستہ ہو گئے تھے۔
آج جب میں یومِ آزادی کی تقریبات دیکھتی ہوں، تو مجھے بے عزت محسوس ہوتی ہے۔ میں ان کروڑوں افراد کی یاد میں سر جھکا کر دعا کرتی ہوں، جنہوں نے آزادی کے نام پر اپنا سب کچھ کھو دیا۔ جنہوں نے اپنے گھر، خاندان، اور عزت کو قربان کر دیا، اور بچ جانے والے پناہ گزین کیمپوں کی غیر انسانی حالتوں میں زندگی گزارنے پر مجبور ہوئے۔
اندرا کمار ہو یا تقسیم سے قبل لاہور میں رہنے والے دوسرے ہندو، سکھ گھرانے آج بھی جب لاہور کی زمین پر گرم رکھتے ہیں تو اس تاریخی شہر کی عظمت کو سجدہ کرتے ہیں ۔
( اگلے کالم میں پھر کسی ہندو گھرانے کی لاہور سے جڑی یادوں کو رقم کروں گا)۔