ایران کے صدر سید ابراہیم رئیسی آج تین روزہ دورے پر پاکستان پہنچے اس دوران وزیراعظم ہاؤس میں دونوں ممالک میں کئی معاہدوں اور مفاہمتی یادداشتوں پر دستخط ہوئے۔
ایرانی صدر ابراہیم رئیسی پاکستان آمد کے بعد وزیراعظم ہاؤس پہنچے جہاں ان کا وزیراعظم شہباز شریف نے پُرتپاک استقبال کیا اور پاک فوج کے دستے نے انہیں گارڈ آف آنر پیش کیا۔ اس موقع پر دونوں ممالک کے درمیان معاہدوں پر دستخط کی تقریب بھی منعقد ہوئی۔
وزیراعطم ہاؤس میں منعقدہ تقریب میں دونوں ممالک کے درمیان 8 مفاہمتی یادداشتوں اور معاہدوں پر دستخط کی تقریب ہوئی جس میں وزیراعظم شہباز شریف اور ایرانی صدر ابراہیم رئیسی نے بھی شرکت کی۔
تقریب میں پاکستان اور ایران کے درمیان باہمی سیکیورٹی تعاون کے معاہدے کی توثیق کی گئی جب کہ دونوں ممالک کے درمیان عدالتی معاونت کے سمجھوتے پر دستخط کیے گئے۔
پاکستان اور ایران کے درمیان خصوصی اقتصادی زون کیلیے مشترکہ تعاون اور ویٹرنری اور حیوانات کی صحت سے متعلق معاہدوں پر بھی دستخط کیے گئے۔
اس کے علاوہ پاکستان اور ایران کی وزارت اطلاعات کے درمیان فلم کے تبادلوں اور دونوں ممالک کے درمیان سمندر پار پاکستانیز، انسانی ترقی اور سوشل ویلفیئر سے متعلق معاہدوں پر بھی دستخط کیے گئے۔
