48 گھنٹے میں زلزلہ پیشگوئی: کوئٹہ انتظامیہ کی بڑے پیمانے پر تیاریاں شروع
جیسا کہ قارئین کو معلوم ہے کہ ترکیہ میں زلزلے سے قبل پیش گوئی کرنیوالے ڈچ سائنسدان نے پاکستان میں آئندہ 48 گھنٹوں میں طاقتور زلزلے کی پیشگوئی کردی ، جس کی شدت چھ یا اُس سے زائدہو سکتی ہے۔ اسے سوشل میڈیا صارفین زیادہ سنجیدہ نہیں لے رہے تھے تاہم اب حکومت اور کوئٹہ کی انتظامیہ نے اس پر بیان جاری کرکے صورتحال کی سنجیدگی کا اندازہ دیا ہے۔
تفصیلات کے مطابق ڈچ زلزلہ پیما ریسرچ انسٹیٹیوٹ سولر سسٹم جیومیٹری سروے نے چمن فالٹ لائن کو انتہائی طاقتور ممکنہ زلزلہ کا ریجن قرار دیا ہے۔
کمشنر کوئٹہ ڈویژن حمزہ شفقات نے بین الاقوامی ادارے کی جانب سے دعوی سامنے آنے کے بعد واضح کیا ہے کہ ’اب تک محکمہ موسمیات کی جانب سے اس رپورٹ کی تصدیق نہیں کی گئی‘ تاہم انھوں نے یقین دہانی کرائی کہ انتظامیہ کسی بھی صورت حال کے لیے تیاری کر رہی ہے۔
سوشل میڈیا پر جاری بیان میں کمشنر کوئٹہ ڈویژن نے کہا کہ ہم اب بھی فرضی مشقیں کر رہے ہیں اور کسی بھی صورت حال کے لیے تیاری کر رہے ہیں۔
میں کوئٹہ کے رہائشیوں کو ایک حالیہ زلزلہ کی سرگرمی کی رپورٹ کے بارے میں مطلع کرنا چاہتا ہوں جو اس خطے میں زلزلے کے امکان کی نشاندہی کرتی ہے۔ محکمہ موسمیات کے ذریعہ اس رپورٹ کی تصدیق ابھی تک نہیں کی گئی ہے۔ بار بار عوام کی طرف سے اس بارے میں پوچھا جا رہا ہے ۔ اس لئے یہ پریس ریلیز…
— Muhammed Hamza Shafqaat (@hamzashafqaat) October 2, 2023
میں سب کو یقین دلانا چاہتا ہوں کہ ہمارے شہر کی ایمرجنسی سروسز بشمول آرمی، پی ڈی ایم اے، لیویز، پولیس، فائر اور میڈیکل ٹیمیں کسی بھی صورت حال سے نمٹنے کے لیے پوری طرح تیار ہیں۔ یاد رہے کہ زلزلہ سینسر ریسرچ انسٹی ٹیوٹ نے سطح سمندر کے قریب فضا میں برقی چارج کے اتار چڑھاؤ کی اطلاع دی ہے، جس کی وجہ سے نقشے میں جامنی رنگ والے علاقوں بشمول پاکستان کے صوبہ بلوچستان میں آئندہ چند روز میں طاقتور زلزلہ آ سکتا ہے۔
