*طویل انتظار کا خاتمہ: ملکی فٹ بال کی بحالی کے لیے تاریخی ‘ڈسٹرکٹ فٹ بال چیمپئن شپ 2026’ کا اعلان*
لاہور: پاکستان میں طویل عرصے سے منتظر مقامی فٹ بال کا بالآخر آغاز ہونے جا رہا ہے۔ پاکستان فٹ بال فیڈریشن نے نچلی سطح پر فٹ بال کی مہم کو تیز کرنے، نئے ٹیلنٹ کی تلاش اور ملکی فٹ بال کے ڈھانچے کو مضبوط بنانے کے لیے ملک گیر "ڈسٹرکٹ فٹ بال چیمپئن شپ 2026” کا باقاعدہ اعلان کر دیا ہے۔
لاہور میں پی ایف ایف کے چیف آپریٹنگ آفیسر محمد شاہد نیاز کھوکھر نے پی ایف ایف ڈائریکٹر میڈیا عمید وسیم اور ویڈیو لنک کے ذریعے شریک صوبائی و علاقائی فٹ بال سربراہان کے ہمراہ پریس کانفرنس کی۔ انہوں نے انکشاف کیا کہ پاکستان فٹ بال کی تاریخ میں پہلی بار فیڈریشن تمام اضلاع کو اس چیمپئن شپ کے کامیاب انعقاد کے لیے جامع پیشہ ورانہ، مالی اور انتظامی تعاون فراہم کرے گی۔
شاہد نیاز کھوکھر نے مشاورتی عمل میں صوبائی اور علاقائی صدور کے تعمیری کردار کو سراہا اور اس تاریخی اقدام کا سہرا پی ایف ایف کے صدر سید محسن گیلانی کے سر باندھا۔ انہوں نے کہا: "محسن گیلانی کی قیادت میں پاکستان فٹ بال نے بین الاقوامی سطح پر نمایاں ترقی کی ہے جسے فیفا اور اے ایف سی کے حکام نے بھی تسلیم کیا ہے۔ اب ہمارا پورا محور اسی وژن اور عزم کو نچلی سطح (گراس روٹس) پر لانا ہے۔ صدر پی ایف ایف ان مقابلوں کے لیے فیفا اور اے ایف سی سے ہر قسم کی، خصوصاً مالی امداد حاصل کرنے کے لیے انتہائی پرعزم ہیں۔”
سی او او نے واضح کیا کہ ضلعی فٹ بال ایسوسی ایشنز ان مقابلوں کا انعقاد کریں گی جبکہ فیڈریشن کوآرڈینیٹر کا کردار ادا کرتے ہوئے لاجسٹک اور تکنیکی مدد دے گی۔ اس مقصد کے لیے چاروں صوبوں اور تینوں خطوں (اسلام آباد، گلگت بلتستان اور آزاد جموں و کشمیر) کے نمائندوں پر مشتمل ایک مشترکہ کمیٹی قائم کی گئی ہے۔
ڈسٹرکٹ چیمپئن شپ 2026 کے فوری بعد پی ایف ایف "نیشنل کلب چیمپئن شپ” کا انعقاد کرے گی۔ اضلاع سے سامنے آنے والے باصلاحیت کھلاڑیوں کو پی ایف ایف کے کوالیفائیڈ کوچز کے زیر نگرانی منظم تربیت دی جائے گی تاکہ وہ میرٹ کی بنیاد پر کلب فٹ بال سے ہوتے ہوئے بتدریج قومی ٹیم تک رسائی حاصل کر سکیں۔
شاہد نیاز کھوکھر نے نوجوان کھلاڑیوں کے لیے "نیشنل انڈر 17 چیمپئن شپ” کی تفصیلات بتاتے ہوئے کہا کہ ستمبر 2026 کے پہلے ہفتے میں ہونے والے اس ٹورنامنٹ کے تمام اخراجات پی ایف ایف برداشت کرے گی۔ اس ایونٹ کے لیے چاروں صوبوں سے دو دو جبکہ اسلام آباد، گلگت بلتستان اور آزاد کشمیر سے ایک ایک ٹیم حصہ لے گی۔ اس چیمپئن شپ کے بہترین کھلاڑیوں کو ساف انڈر 17 چیمپئن شپ اور اے ایف سی انڈر 17 کوالیفائرز کے لیے تشکیل دی جانے والی قومی یوتھ ٹیموں کا حصہ بنایا جائے گا۔
انہوں نے بات چیت کا اختتام کرتے ہوئے کہا کہ صدر محسن گیلانی کی متحرک قیادت میں کھلاڑیوں کو صلاحیتیں نکھارنے کے بہترین مواقع دیے جا رہے ہیں اور ہمیں امید ہے کہ یہ ٹیلنٹ آگے چل کر عالمی سطح پر پاکستان کا نام روشن کرے گا۔
