لاہور :
ملت ٹریکٹرز جونیئر نیشنل ٹینس چیمپئن شپ 2026 کا باقاعدہ آغاز پیر کے روز پنجاب ٹینس اکیڈمی، باغِ جناح لاہور میں ہوا، جو ملک میں ابھرتے ہوئے نوجوان ٹینس ٹیلنٹ کی سرپرستی کی جانب ایک اہم قدم قرار دیا جا رہا ہے۔
افتتاحی تقریب کے مہمانِ خصوصی ملت ٹریکٹرز کے سینئر مینیجر ایڈمنسٹریشن عمران ایوب تھے۔ اس موقع پر ٹینس حلقوں کی نمایاں شخصیات کی بڑی تعداد موجود تھی جن میں پنجاب لان ٹینس ایسوسی ایشن (پی ایل ٹی اے) کے سینئر ایگزیکٹو نائب صدر رشید ملک (تمغۂ امتیاز)، ٹورنامنٹ ریفری فہیم صدیقی، پی ایل ٹی اے کے سینئر کوچ محبوب وحید جان، پیرنٹس ٹینس لوورز ایسوسی ایشن کے صدر سید ساجد علی بخاری، کھلاڑی، ان کے والدین اور ٹینس شائقین شامل تھے۔
تقریب سے خطاب کرتے ہوئے رشید ملک نے تمام کھلاڑیوں کے لیے نیک تمناؤں کا اظہار کیا اور نوجوان ٹینس اسٹارز پر زور دیا کہ وہ جذبے، نظم و ضبط اور لگن کے ساتھ مقابلہ کریں۔ انہوں نے کھلاڑیوں کو تلقین کی کہ وہ اعلیٰ کارکردگی کا مظاہرہ کر کے بین الاقوامی سطح پر پاکستان کا نام روشن کریں، جبکہ پاکستان میں ٹینس کے فروغ کے لیے ملت ٹریکٹرز کی مسلسل معاونت کو بھی سراہا۔
چیمپئن شپ کے دوران بوائز انڈر 18 کیٹیگری کے پہلے راؤنڈ میں حمزہ علی رضوان، علیان علی، محمد معاذ، محمد احمد افضل، روحاب فیصل، معظم بابر، عتیق الرحمن اور عالی حسین نے شاندار فتوحات کے ساتھ اگلے مرحلے کے لیے کوالیفائی کیا۔
بوائز انڈر 14 کیٹیگری میں محمد جنید، احدِ مصطفیٰ، سالار خان، اشتر عالم خان، مصطفیٰ ازیر رانا، ریان عمر خلیل، شہزادین فیصل، محمد ابراہیم حسین گل اور محمد فیضان نے عمدہ کارکردگی دکھاتے ہوئے اگلے راؤنڈ میں جگہ بنا لی۔
