علی امین گنڈا پور کی قیادت میں پی ٹی آئی کا قافلہ ’پنجاب کی حدود میں داخل

پاکستان تحریک انصاف کی ’فائنل کال‘ کے لیے وزیراعلیٰ خیبر پختونخوا علی امین گنڈاپور کی قیادت میں آج سہہ پہر پشاور سے روانہ ہونے والا احتجاجی قافلہ چھج انٹر چینج کے قریب پہنچ چکا ہے۔

پاکستان تحریک انصاف پشاور ریجن کے صدر ارباب عاصم نے بی بی سی کے عزیز اللہ خان کو بتایا ہے کہ ان کا قافلہ وزیر اعلی علی امین گنڈہ پور کی قیادت میں اب سے تھوڑی دیر پہلے یعنی تقریباً 9 بجے چھج انٹر چینج کے قریب پہنچنے والا تھا۔

ان کا کہنا تھا بشری بی بی سمیت دیگر قائدین بھی اس قافلے میں شامل ہیں۔

ارباب عاصم نے دعویٰ کیا کہ وفاقی حکومت کی جانب سے اس قافلے کی راہ میں رکاوٹیں کھڑی کی گئی ہیں اور ان کو عبور کرتے کرتے وقت لگ رہا ہے۔

انھوں نے مزید بتایا کہ کہ قافلے میں شامل قائدین نے بتایا ہے کہ ہو سکتا ہے آج رات موٹر وے پر ہی گزارنی پڑے اور صبح اسلام آباد میں داخل ہوں گے۔