پی ٹی آئی برطانیہ کے رہنما اور سابق وزیراعظم عمران خان کے ترجمان صاحبزادہ جہانگیر نے برطانوی حکومت کو خط لکھا ہے۔
خط کے متن کے مطابق پاکستان میں انسانی حقوق کی خلاف ورزی عروج پر ہے، برطانوی حکومت ایسے حالات میں پاکستان سے معمول کے مطابق معاملات چلارہی ہے، برطانوی حکومت کو پاکستان پر انسانی حقوق کی پاسداری کیلئے دباؤ بڑھانا چاہیے۔
ان کا کہنا تھا کہ برٹش پاکستانی ہونے کے ناطے ہمیں انسانی حقوق کی ان خلاف ورزیوں پر بہت تشویش ہے۔عمران خان کی معزول حکومت کو ناانصافی اور دہشت گردی کا نشانہ بنایا جا رہا ہے، عمران خان کے چیف آف سٹاف ڈاکٹر شہباز گل کو گرفتار کر لیا گیا ہے لہٰذا شہباز گل کو عدالت میں پیش ہو کر اپنا دفاع کرنے کی اجازت دی جائے۔
صاحبزادہ جہانگیر نے خط میں الزام لگایا کہ شہباز گل کو دوران حراست برہنہ کر کے بدترین تشدد کا نشانہ بنایا گیا اور دوران ریمانڈ شہباز گل کو جنسی زیادتی کا نشانہ بھی بنایا گیا، ڈاکٹر گل کو عمران خان سے متعلق معلومات لینے کیلئے تشدد کا نشانہ بنایا جا رہا ہے۔
خط میں کہا گیا ہے کہ پاکستانی تارکین وطن کا مطالبہ ہے کہ تشدد روکنے کیلئے پاکستانی حکومت پرسفارتی دباؤ ڈالا جائے، اگر یہ تشدد فوری طور پر ختم نہ ہوا تو سنگین نتائج برآمد ہوں گے۔شہبازگل کے ڈرائیورکی بیوی کو بھی گرفتار کر لیا گیا، یہ سب اس عمل کا آغاز ہے جو دہشت گردی کا راج بن سکتا ہے
