نوح بٹ کا ازبکستان میں ڈبل گولڈ کا معرکہ؛ کامیابی

*نوح بٹ کا ازبکستان میں ڈبل گولڈ کا معرکہ؛ کامیابی والدین کے نام، اولمپک گولڈ پر نظریں*

لاہور: پاکستان کے مایہ ناز ویٹ لفٹر اور پاور لفٹر نوح دستگیر بٹ نے ازبکستان میں ہونے والے انٹرنیشنل ورلڈ اسٹرونگ مین مقابلوں میں شاندار کارکردگی کا مظاہرہ کرتے ہوئے ڈبل گولڈ میڈلز اپنے نام کر لیے۔ انہوں نے اپنی اس تاریخی کامیابی کو والدین کے نام کرتے ہوئے کہا کہ ان کے کھیل کے سفر میں والدین کی بھرپور حمایت اور قربانیاں شامل ہیں۔

کامن ویلتھ گیمز کے چیمپئن نوح دستگیر بٹ نے بین الاقوامی سطح پر ایک بار پھر پاکستان کا پرچم بلند کیا۔ انہوں نے پہلا گولڈ میڈل ازبکستان کے شہر ’خیوا‘ میں اور دوسرا اعزاز ’تاشقند‘ میں حاصل کیا، جس سے دنیا بھر میں ان کی ساکھ مزید مستحکم ہوئی ہے۔

اپنی شاندار فتح کے بعد گفتگو کرتے ہوئے نوح بٹ کا کہنا تھا کہ "اللہ تعالیٰ کے بعد میرے والدین میری طاقت اور کامیابی کا سب سے بڑا ذریعہ ہیں۔ انہوں نے مشکل ترین حالات میں بھی میرا حوصلہ ٹوٹنے نہیں دیا اور ہمیشہ مجھے بہترین کارکردگی کے لیے متحرک کیا۔ یہ کامیابیاں ان کی قربانیوں اور مجھ پر غیر متزلزل اعتماد کا منہ بولتا ثبوت ہیں۔”

نوح دستگیر بٹ نے اپنے سرپرست اور اسپانسر، ایکٹیوٹ کے سی ای او اور نیشنل ہسپتال کے ڈائریکٹر رضوان آفتاب احمد کا بھی خصوصی شکریہ ادا کیا۔ انہوں نے کہا کہ رضوان آفتاب کی رہنمائی اور مالی و اخلاقی تعاون نے انہیں ایک پیشہ ور کھلاڑی بنانے میں کلیدی کردار ادا کیا، جس کی بدولت وہ پورے اعتماد کے ساتھ اپنے اہداف حاصل کر رہے ہیں۔

کامن ویلتھ چیمپئن نے اس عزم کا اظہار کیا کہ ان کی حالیہ کامیابیوں نے ملک کا نام روشن کرنے کے ان کے ارادے کو مزید مضبوط کر دیا ہے۔ ان کا حتمی ہدف اب لاس اینجلس اولمپکس میں پاکستان کے لیے گولڈ میڈل جیتنا ہے۔ انہوں نے کہا، "میں پاکستان کے لیے مزید عالمی اعزازات جیتنا چاہتا ہوں۔ میرا سب سے بڑا خواب اولمپک پوڈیم پر کھڑے ہو کر ملک کے لیے سونا جیتنا ہے، بالکل اسی طرح جیسے ارشد ندیم نے اولمپکس میں انفرادی گولڈ میڈل جیت کر تاریخ رقم کی تھی۔”

*نوح دستگیر بٹ کا شاندار ریکارڈ:*

نوح بٹ نے پہلی بار 2018 کے کامن ویلتھ گیمز میں کانسی کا تمغہ جیت کر عالمی سطح پر اپنی پہچان بنائی۔ 2022 کے کامن ویلتھ گیمز میں انہوں نے ریکارڈ 405 کلوگرام وزن اٹھا کر پاکستان کے لیے پہلا گولڈ میڈل جیتا، جس پر انہیں صدارتی اعزاز ‘پرائیڈ آف پرفارمنس’ سے بھی نوازا گیا۔ انجری اور دیگر مشکلات کے بعد انہوں نے پاور لفٹنگ کا رخ کیا اور 2024 میں کامن ویلتھ پاور لفٹنگ میں گولڈ میڈل جیتا اور ایشین اسکواٹ ریکارڈ قائم کیا۔ حال ہی میں انہوں نے ‘پہلوان محمود اسٹرونگ مین گیمز’ اور ازبکستان میں ورلڈ اسٹرونگ مین چیمپئن شپ میں دو طلائی تمغے جیت کر پاکستان کی کھیلوں کی تاریخ میں ایک اور سنہری باب کا اضافہ کر دیا ہے۔