پاکستان کے وزیراعظم محمد شہباز شریف نے رحیم یار خان میں متحدہ عرب امارات کے صدر شیخ محمد بن زاید النہیان سے ملاقات کی ہے۔
وزیر اعظم آفس سے جاری اعلامیے کے مطابق یہ ملاقات دونوں رہنماؤں کے درمیان اسلام آباد میں 26 دسمبر 2025 کو ہونے والی ملاقات کا تسلسل ہے۔
یاد رہے 26 دسمبر کو صدرِ امارات نے پاکستان کا پہلا سرکاری دورہ کیا تھا۔
اس موقع پر وزیراعظم نے کہا کہ پاکستان اور متحدہ عرب امارات کے دیرینہ برادرانہ تعلقات کو ایک سٹریٹجک اور باہمی فائدے پر مبنی معاشی شراکت داری میں تبدیل کرنا ان کی پختہ خواہش ہے۔
شہباز شریف کے مطابق ’دونوں ممالک کو تجارتی تعلقات میں نمایاں اضافہ کرنا چاہیے تاکہ اسے مطلوبہ سطح تک لے جایا جا سکے۔‘
دونوں رہنماؤں نے آئی ٹی، توانائی، معدنیات و کان کنی، اور دفاعی شعبے میں تعاون بڑھانے کے طریقوں پر بھی بات چیت کی۔
دونوں رہنماوں نے دوطرفہ تعاون کے علاوہ مختلف علاقائی اور عالمی امور پر بھی تبادلہ خیال کیا۔ بیان کے مطابق یہ ملاقات پاکستان اور متحدہ عرب امارات کے درمیان ایک سال کے دوران قیادت کی سطح پر ہونے والے بھرپور روابط کا تسلسل ہے۔
