8اکتوبر: تباہی کی عبارت لکھ گیا!

8اکتوبر: تباہی کی عبارت لکھ گیا!
تحریر: عابد ضمیر ہاشمی
آزاد کشمیر آٹھ اکتوبر 2005ء کا وہ درد ناک دِن ہے جہاں کئی بوڑھے اپنی جوان اولاد کی لاشیں اٹھا رہے تھے، کہیں کندھے دینے والوں نے کندھا مانگ لیا، کئی مائوں کے کلیجے چھلنی ہوئے، کئی بچے سکول تو گئے لیکن واپسی کے لئے مائیں تا حشر ترسیں گئیں، کئی بستیاں اجڑ گئیں، کئی امیدیں ختم ہوئیں، وہ قیامت صغریٰ اپنے ان گنت نقوش چھوڑ گی۔ جہاں بڑی تعداد میں بچے اپنے سکولوں میں ہی دفن ہو گئے وہیں بچ جانے والے ننھے دماغوں پر گہرے نقوش ثبت ہو گئے۔ ایک قیامت تھی جو آ کر گزر گئی تھی۔ لوگ سکتے کی کیفیت میں تھے۔ یقین آتا بھی تو کیسے؟ نہ کبھی دیکھا نہ سنا۔ یوں بھی کبھی ہوتا ہے کہ آن کی آن میں گائوں کے گائوں اور بستیوں کی بستیاں خاک ہو جائیں؟ لینڈ سلائیڈنگ کے باعث راستے معدوم ہو چکے تھے۔ میلوں پیدل دشوار راستوں پر سفر کر کے لوگ اپنے آبائی علاقوں تک جا رہے تھے کہ کسی اپنے کو زندہ سلامت دیکھ سکیں۔
’’ خشکی اور تری میں لوگوں کے اعمال کے سبب فساد پھیل گیا ہے تاکہ خدا اُن کو اُن کے بعض اعمال کا مزہ چکھائے عجب نہیں کہ وہ باز آجائیں ‘‘ ( سورۃ روم)۔
زلزلے کی حقیقت اور اس کے اسباب کے بارے میں مختلف نظریات ہیں۔ سائنسدانوں کا کہنا ہے کہ ایک عرصے کے بعد زمین کی پلیٹیں تبدیل ہوتی ہیں۔ جب زمین کی پلیٹیں تبدیل ہوتی ہیں تو اس سے پیدا ہونے والی کشمکش کو زلزلے سے تعبیر کیا جاتاہے۔ چونکہ یہ جدید سائنس اور ٹیکنالوجی کا دور ہے۔
حدیث کی رو سے زلزلے کی وجہ انسانوں کی بد اعمالیاں اور گناہ ہیں۔ حضرت ابوہریرہؓ روایت کرتے ہیں کہ آپؐ نے فرمایا: ’’ جب مال غنیمت دولت سمیٹنے کا ذریعہ بن جائے، امانت کو غنیمت سمجھا جائے اور زکوٰۃ کو بوجھ سمجھا جائے، دین کا علم دنیوی مقصد کے تحت حاصل کیا جائے، آدمی اپنی بیوی کی فرمانبرداری کرے اور ماں کی نافرمانی کرے۔ دوست سے قربت بڑھائی جائے اور باپ سے دوری اختیار کی جائے۔ مساجد میں شور و غل بلند ہونے لگے اور معاشرے کا درد سر بنے، کسی کے شر سے بچنے کے لیے اس کی عزت کی جائے۔ اداکارائیں اور موسیقی کے آلات عام ہوجائیں۔ شراب سر عام پی جانے لگے۔ اس امت کے بعد والے لوگ پہلے والوں کو برا بھلا کہیں تو پھر انتظار کرو تندوتیز ہوائوں کا، زمین میں زلزلوں کا، زمین میں دھنسے جانے کا، بندر و خنزیر بنائے جانے کا اور آسمان سے پتھر برسنے کا اور یکے بعد دیگر ے آنے والی ایسی نشانیوں کا جو تسبیح کی لڑی ٹوٹنے کے بعد تسبیح کے دانوں کے گرنے کی طرح پے در پے آئیں گی‘‘۔
ایک اور حدیث میں حضرت عائشہؓ فرماتی ہیں: ’’ جب شادی شدہ عورتیں بہک جائیں، جب لوگ زنا کو حلال سمجھنے لگیں، شراب پئیں اور گانوں کی محفلیں سجنے لگیں تو اللہ تعالیٰ کو آسمان میں غیرت آتی ہے، وہ زمین کو حکم دیتا ہے، زمین میں زلزلے آنے لگتے ہیں‘‘۔
سائنس و ٹیکنالوجی اور جدید ریسرچ میں عبور حاصل کرنا غیر مسلموں کا اثاثہ نہیں بلکہ یہ مسلمانوں کی میراث بھی ہے اور فرض بھی۔ اسلام کے وہ بنیادی تصورات اور تعلیم جس سے تقریباً ہر مسلمان واقف ہے۔ جدید ریسرچ پر ہی زور دیتے ہیں۔ ہماری کہکشاں گلیکسی وے میں سورج جیسے اربوں ستارے ہیں ان کے اپنے نظام شمسی ہیں۔ سورج سے ہزاروں گُنا بڑے ستارے بھی ہماری کہکشاں میں موجود ہیں۔ ہماری کہکشاں سے سیکڑوں بلکہ ہزاروں گُنا بڑی کئی کہکشائیں دریافت ہوچکی ہیں۔ کائنات میں کھربوں میل کی کوئی حیثیت نہیں ہے۔ سب سے پہلے انسان نے اپنی بنیادی ضروریات پر توجہ دی۔ دھاتوں کو اپنے استعمال میں لایا، پھر آہستہ آہستہ سائنسی ایجادات کی دُنیا میں داخل ہوا ، اب ہر لمحہ نِت نئی ایجادات ہو رہی ہیں، مگر یہ سارا علِم وہ ہے کہ جو آدم کو اللہ کا نائب ڈکلیئر کرنے سے پہلے ہی عطا کر دیا گیا تھا۔
جوہری سائنسدانوں نے انتہائی خوفناک اور شدت کے ساتھ زلزلے کے خدشے کا اظہار کیا ہے۔ یہ اس قدر خطرناک ہوگا کہ براعظموں کو جدا کر دیگا اور اس سے کروڑوں لوگ ہلاک ہوجائیں گے۔ شمالی اور جنوبی امریکہ کے براعظم ٹوٹ کے الگ ہوجائیں گے۔ میگا سونامی کے ٹکرانے سے امریکہ اور ایشیاء میں تقریبا 4کروڑ افراد ہلاک ہوسکتے ہیں۔ یونیورسٹی آف لندن میں جوہری انجینئرنگ کی تعلیم حاصل کرنے والے ایک ڈاکٹر نے دعویٰ بھی کیا کہ یہ سونامی اور زلزلہ اس قدر شدید ہوگا کہ صرف امریکہ کے مغربی ساحل پر 2کروڑ افراد ہلاک ہو سکتے ہیں۔ انہی حالات کو مدنظر رکھتے ہوئے سائنس دانوں نے Svalbardنامی جزیرے میں تمام جینز کو محفوظ کرنے کا پروگرام بنایا تھا۔ ’’ سوالبارڈ‘‘ نارتھ پول اور ناروے کے بیچ میں واقع ایک ٹھنڈا جزیرہ ہے۔ یہ دُنیا کا سب سے سرد علاقہ ہے۔ اس کا درجہ حرارت ہمیشہ منفی ڈگری سینٹی گریڈ رہتا ہے۔ اس میں ’’ حفاظتی تہہ خانہ‘‘ بنایا گیا ہے۔ یہ سمندر کی سطح سے 130میٹر بلند ہے۔ جو کسی بھی سمندری آفت یا سطح سمندر کے بڑھنے کے خطرات سے محفوظ رہے گا۔ اس میں تین والٹس بنائے گئے ہیں جن میں 15لاکھ بیجوں کے سیمپلز فی والٹ رکھے جاسکتے ہیں۔ مجموعی طورپر 45لاکھ نمونے رکھے جاسکتے ہیں۔ یہاں کا درجہ حرارت منفی 18ڈگری رکھا جائے گا جوکہ ان بیجوں اور جینز کی عرصہ دراز تک حفاظت کے لئے ضروری ہے۔
انسان زلزلے سے بچائو کی تدابیر اختیار کرے اچھی بات ہے۔ حکومتیں سیلاب اور زلزلے کے نقصانات کو کم سے کم کرنے کی سر توڑ کوششیں کریں۔ ایسے اقدامات کو سر آنکھوں پر، لیکن خدارا! حقائق سے آنکھیں نہ چرائیں۔ من حاصل مسلمان قوم ہمیں اعمال کی اصلاح کرنی چاہیے، مگر اس کے برعکس کہا جاتا ہے کہ عمارتیں جتنی مضبوط بنالی جائیں قدرتی آفات ان عمارتوں کو پھر بھی تباہ کر سکتی ہیں۔ سونامی کو جاپان نہیں روک پایا۔ تباہ کن ہوائوں کو امریکہ قابو نہ کر پایا۔ عمارتیں جتنی زلزلہ پروف بنالی جائیں، زلزلے کے خوف اور اس کے نقصانات سے انسان خود کو بچا نہیں پائے گا۔ اسلام آباد، کراچی اور آزاد کشمیر کے کئی علاقوں کے بارے میں کہا جاتاہے کہ یہ فالٹ لائنز کے بالکل اوپر ہیں اور کشمیر کی فالٹ لائن پھر سے ایکٹیو ہو چکی ہے۔ جو کہا جارہا ہے کہ کسی بھی وقت بڑا زلزلہ ہو سکتا ہے ۔ ماہر کا کہنا ہے کہ زلزلہ انسان کو نہیں مارتا بلکہ لاپرواہی، غفلت اور عدم توجہی انسانی جانوں کے ضیاع کا سبب بنتی ہیں۔ ایسی فالٹ لائن، ریڈ زون پر سات، سات منزلہ عمارتیں بنانا، بوسیدہ عمارتیں میں رہائش پذیر ہونا خود کشی کے مترادف ہے۔ اسلام نے جان کی حفاظت کو فرض قرار دیا ہے۔
زلزلے صرف زیر زمین پلیٹوں کے ملنے یا چٹانوں کے کھسکنے کی وجہ سے نہیں آتے بلکہ یہ انسانوں کی بداعمالیوں کی وجہ سے آتے ہیں اور یہ زلزلے انہیں بد اعمالیوں سے باز آنے کے لیے الارم اور وارننگ ہیں، لہٰذا یہ بندوں کے حق میں رحمت ہیں کہ اُن کو اِسی دنیا میں اپنی اصلاح کے لیے مواقع فراہم کیے جاتے ہیں۔ ہاں زلزلہ آتا ہے اگر وہاں کے لوگ توبہ کر لیں اور بد اعمالیوں سے باز آجائیں تو ان کے حق میں بہتر ہے، ورنہ ان کے لیے ہلاکت ہے۔ مستعد رہیے، غیر متوقع کے لئے تیار رہیں۔