پنجاب حکومت کے بہترین اقدامات کا سرسری جائزہ

طارق خان ترین

وزیراعلیٰ پنجاب مریم نواز کے دور میں عوامی فلاح و بہبود کیلئے متعدد انقلابی منصوبے شروع کئے گئے ہیں، جن کا مقصد صوبے کی ترقی اور عوام کی زندگی میں بہتری لانا ہے۔ ان منصوبوں میں خاص طور پر لوڈشیڈنگ کے مسئلے کو حل کرنے کیلئے سولرائزیشن منصوبہ متعارف کرایا گیا ہے، جس کے تحت سرکاری دفاتر، تعلیمی اداروں، اور گھریلو صارفین کو سولر پاور کے ذریعے بجلی فراہم کی جارہی ہے۔ اس منصوبے سے نہ صرف لوڈشیڈنگ کے مسئلے میں کمی آئی ہے بلکہ ماحول دوست توانائی کے ذرائع کو فروغ بھی ملا ہے۔
گھروں کی ملکیت کے مسئلے کو حل کرنے کیلئے "اپنی چھت اپنا گھر” منصوبہ شروع کیا گیا ہے، جس کے تحت کم آمدنی والے افراد کو آسان اقساط پر مکانات فراہم کئے جارہے ہیں۔ یہ منصوبہ نہ صرف عوام کو رہائشی سہولیات فراہم کرتا ہے بلکہ تعمیراتی صنعت کو بھی فروغ دیتا ہے، جس سے معیشت کو تقویت مل رہی ہے۔ اسی طرح، صوبے میں پائیدار پیداواری صلاحیت کو بڑھانے کیلئے جدید زرعی ٹیکنالوجی اور آلات کی فراہمی کو یقینی بنایا گیا ہے، جس سے کسانوں کی پیداوار میں اضافہ ہورہا ہے اور غذائی خود کفالت کی طرف اہم پیش رفت ہورہی ہے۔
پنجاب حکومت کا پنڈی مری گلاس ٹرین منصوبہ خطے میں سیاحت اور عوامی سفری سہولتوں کو بہتر بنانے کیلئے ایک اہم قدم ہے۔ اس منصوبے کا مقصد راولپنڈی اور مری کے درمیان جدید اور تیز رفتار ٹرین سروس فراہم کرنا ہے، جو نہ صرف سفری وقت کو کم کرے گا بلکہ سیاحتی علاقوں کی ترقی میں بھی معاون ثابت ہوگا۔ گلاس ٹرین کا ڈیزائن ایسا ہوگا کہ مسافر سفر کے دوران قدرتی مناظر کا بھرپور لطف اٹھا سکیں گے۔ یہ منصوبہ ماحولیاتی تحفظ اور جدید ٹرانسپورٹیشن کے اصولوں کو مدنظر رکھتے ہوئے تیار کیا گیا ہے، جو پنجاب میں سیاحت کے فروغ اور عوامی سفر میں آسانی پیدا کرنے کا ذریعہ بنے گا۔
پنجاب میں جنگلات کے تحفظ کیلئے بھی بڑے پیمانے پر اقدامات کئے گئے ہیں۔ مریم نواز کی حکومت نے صوبے بھر میں شجرکاری مہمات شروع کیں، جن کے تحت لاکھوں درخت لگائے گئے ہیں۔ اس کے ساتھ ساتھ جنگلات کی غیرقانونی کٹائی کو روکنے کیلئے سخت قوانین بنائے گئے ہیں اور ان پر عمل درآمد کو یقینی بنایا گیا ہے تاکہ ماحولیاتی تحفظ کو فروغ مل سکے۔
ترقیاتی منصوبوں میں شفافیت اور کرپشن کی روک تھام کیلئے پبلک سیکٹر ڈیولپمنٹ پروگرام (PSDP)میں اصلاحات کی گئی ہیں۔ ان اصلاحات کے ذریعے منصوبوں کی بروقت تکمیل اور فنڈز کی منصفانہ تقسیم کو یقینی بنایا جارہا ہے۔ کرپشن کی روک تھام کیلئے مانیٹرنگ سسٹمز کو مزید مضبوط بنایا گیا ہے، جس سے عوامی اعتماد میں اضافہ ہوا ہے اور بہتر سروس ڈلیوری کو ممکن بنایا گیا ہے۔ ساتھ ہی، گڈ گورننس کے فروغ کیلئے سرکاری اداروں کی کارکردگی میں بہتری لائی گئی ہے۔
تعلیمی نظام میں بہتری لانے کیلئے نئے تعلیمی اداروں کا قیام اور پرانے اداروں کی اپ گریڈیشن کی گئی ہے۔ دیہی علاقوں میں خصوصی توجہ دی گئی ہے، جہاں گرلز سکولز اور کالجز کے قیام کو یقینی بنایا گیا ہے۔ اس کے علاوہ، نصاب میں جدید مضامین شامل کرکے طلبہ کو عالمی معیار کی تعلیم فراہم کی جارہی ہے۔
سیاحت اور کاروباری مواقع فراہم کرنے کیلئے بھی اقدامات کئے گئے ہیں۔ پنجاب میں نئے سیاحتی مقامات کو ترقی دی جارہی ہے اور انفراسٹرکچر کو بہتر بنایا جارہا ہے تاکہ ملکی اور غیرملکی سیاحوں کو بہترین سہولیات فراہم کی جا سکیں۔ تجارتی سرگرمیوں کے فروغ کیلئے کاروباری قوانین میں نرمی کی گئی ہے اور سرمایہ کاروں کو سہولیات فراہم کی جارہی ہیں۔
آئی ٹی کے شعبے کو فروغ دینے کیلئے خصوصی منصوبے شروع کئے گئے ہیں، جن میں نوجوانوں کو آئی ٹی کے میدان میں تربیت فراہم کی جارہی ہے اور اس شعبے میں سرمایہ کاری کی جارہی ہے۔ اس کے ساتھ ساتھ صحت کے شعبے میں انقلابی اقدامات کئے گئے ہیں، جن میں ایئر ایمبولینس سروس کا افتتاح ایک نمایاں اقدام ہے۔ اس سروس کے ذریعے دور دراز کے علاقوں میں بھی فوری طبی امداد فراہم کی جا رہی ہے۔
مجموعی طور پر، مریم نواز کے ان منصوبوں نے پنجاب کی ترقی اور عوامی فلاح و بہبود میں نمایاں کردار ادا کیا ہے۔ ان منصوبوں کے ذریعے صوبے کی معیشت کو بہتر بنایا جارہا ہے اور عوام کو زندگی کی بنیادی سہولیات فراہم کی جا رہی ہیں۔