پنجاب سے تعلق رکھنے والے تقریباً 24 سیاسی رہنماؤں نے گزشتہ روز سابق صدر مملکت آصف علی زرداری سے ملاقات کے بعد پیپلزپارٹی میں شمولیت اختیار کرلی جن میں سے اکثر پاکستان تحریک انصاف (پی ٹی آئی) کا حصہ تھے۔
متعدد سابق اراکین اسمبلی سمیت اِن 24 سیاسی رہنماؤں میں سے زیادہ تر کا تعلق جنوبی پنجاب سے ہے، ان میں سے 10 کا تعلق ضلع مظفر گڑھ سے جبکہ دیگر کا تعلق اوکاڑہ، بہاولپور، میانوالی، بہاولنگر اور رحیم یار خان سے ہے۔
آصف زرداری نے پارٹی میں نئے آنے والوں کو پیپلزپارٹی کا جھنڈا پہنا کر خوش آمدید کہا، اس موقع پر سابق وزیراعظم سید یوسف رضا گیلانی، نیئر حسین بخاری، سابق گورنر مخدوم احمد محمود اور سید حسن مرتضیٰ بھی موجود تھے۔
خیال رہے کہ مظفر گڑھ کو پیپلز پارٹی کا گڑھ سمجھا جاتا ہے کیونکہ سیاسی لحاظ سے بدترین دور میں بھی پیپلزپارٹی یہاں سے قومی اسمبلی کی 2 سے 3 نشستیں جیتتی رہی ہے۔
پیپلزپارٹی میں شمولیت اختیار کرنے والے ان 24 سیاسی رہنماؤں میں سے ایک نے بتایا کہ انہوں نے پہلے مسلم لیگ (ن) میں جگہ بنانے کی کوشش کی تاہم مسلم لیگ (ن) نے انہیں جگہ دینے سے انکار کر دیا کیونکہ وہ ان رہنماؤں کو کھونا نہیں چاہتی جو پی ٹی آئی کے دور اقتدار میں اسٹیبلشمنٹ کے دباؤ کے باوجود ثابت قدم رہے۔
نام ظاہر نہ کرنے کی درخواست کرتے ہوئے انہوں نے کہا کہ اب ہم پیپلز پارٹی میں شامل ہوگئے ہیں کیونکہ ہر حلقے میں پیپلزپارٹی کا 8 ہزار سے 10 ہزار کا ووٹ بینک ہے اور ایسا لگتا ہے کہ اسٹیبلشمنٹ بھی پیپلزپارٹی کی حمایت کر رہی ہے۔
جنوبی پنجاب سے تعلق رکھنے والے پیپلز پارٹی کے ایک رہنما نے بتایا کہ پارٹی میں شمولیت اختیار کرنے والے یہ لوگ آئندہ انتخابات میں شاید زیادہ مضبوط امیدوار نہ ہوں لیکن کم از کم پیپلز پارٹی اس بار بہتر کارکردگی دکھانے کے لیے ’معقول‘ لوگوں کو پارٹی میں شامل کرنے میں کامیاب رہی۔
یاد رہے کہ پیپلز پارٹی 2018 کے عام انتخابات میں پنجاب سے قومی اسمبلی کی صرف 6 نشستیں جیت سکی تھی، پارٹی رہنما نے مزید کہا کہ ملتان سے بھی بہت سی سیاسی شخصیات جلد ہی پارٹی میں شامل ہوں گی، ان لوگوں کے متعلق فیصلہ سابق وزیر اعظم یوسف رضا گیلانی پارٹی کی سینیئر قیادت سے بات چیت کے بعد کریں گے۔
لاہور: پاکستان پیپلزپارٹی پارلیمنٹرینز کے صدر آصف علی زرداری سے جنوبی پنجاب کے مختلف اضلاع سے تعلق رکھنے والے سیاسی رہنماؤں کی ملاقات
لاہور: سابق صدر مملکت آصف علی زرداری اور جنوبی پنجاب کے مختلف اضلاع سے تعلق رکھنے والے سیاسی رہنماؤں کی بلاول ہاؤس میں ملاقات ہوئی
لاہور: صدر… pic.twitter.com/CoNE2MC5Fb
— PPP (@MediaCellPPP) May 31, 2023
