ایران کے حوالے سے بہت جلد فیصلہ کرنے کی توقع رکھتا ہوں : ٹرمپ

امریکی صدر ڈونلڈ ٹرمپ کا کہنا ہے کہ وہ توقع رکھتے ہیں کہ ایران کے حوالے سے بہت جلد فیصلہ کیا جائے گا۔ یہ موقف دونوں ملکوں کے اس اعلان کے بعد سامنے آیا ہے جس میں کہا گیا تھا کہ ہفتے کے روز سلطنت عمان میں ہونے والی بات چیت "مثبت” اور "تعمیری” رہی، اور دونوں ممالک رواں ہفتے دوبارہ ملاقات پر متفق ہو گئے۔

ٹرمپ یہ دھمکی دے چکے ہیں کہ اگر ایران کے جوہری پروگرام کو روکنے کے لیے معاہدے تک نہیں پہنچا جا سکتا تو فوجی کارروائی کی جائے گی۔ انھوں نے صدارتی طیارے میں صحافیوں سے گفتگو کرتے ہوئے کہا کہ "میں نے ایران کے حوالے سے اپنے مشیروں سے ملاقات کی ہے اور میں جلد فیصلہ کرنے کی توقع رکھتا ہوں”۔
امریکی صدر نے تفصیلات ذکر نہیں کیں۔

ادھر خبروں سے متعلق امریکی ویب سائٹ axios نے دو با خبر ذرائع کے حوالے سے بتایا ہے کہ امریکہ اور ایران کے درمیان جوہری بات چیت کا دوسرا دور ہفتے کے روز اطالوی دار الحکومت روم میں متوقع ہے۔
ہفتے کے روز سلطنت عمان میں ہونے والے مذاکرات ایران اور ٹرمپ کے زیر قیادت انتظامیہ کے بیچ پہلی بات چیت تھی۔ ذمے داران کا کہنا ہے کہ بات چیت کا انعقاد "مفید، پر سکون اور مثبت” فضا میں ہوا۔ٹرمپ

نے اتوار کے روز صحافیوں کو بتایا کہ امریکی ایرانی بات چیت "اچھی” رہی۔ انھوں نے مزید کہا کہ "جب تک بات چیت اختتام پذیر نہیں ہو جاتی ، کوئی چیز اہمیت نہیں رکھتی۔ اس لیے میں اس کے بارے میں بات کرنا پسند نہیں کر رہا، تاہم یہ ٹھیک رہی۔ میں سمجھتا ہوں کہ ایران سے متعلق صورت حال بہت اچھی ہے”۔
بات چیت کے پہلے مرحلے کے اختتام پر ایران اور امریکہ کا کہنا تھا کہ انھوں نے ہفتے کے روز سلطنت عمان میں "مثبت” اور "تعمیری” بات چیت کی۔ فریقین آئندہ ہفتے بات چیت دوبارہ شروع کرنے پر متفق ہو گئے۔