کمسن بیٹے سے ہوائی فائرنگ کروا کے ویڈیو سوشل میڈیا پر وائرل کرنے والا ملزم گرفتار

کمسن بیٹے سے ہوائی فائرنگ کروا کے ویڈیو سوشل میڈیا پر وائرل کرنے والا  ملزم سکندر کے خلاف تھانہ صدر سانگلہ ہل میں مقدمہ درج کر لیا گیا۔

تھانہ صدر سانگلہ ہل کے نواحی گاؤں پکھاریوال کے رہائشی ملزم سکندر نے اپنے 9 سالہ بیٹے حمزہ سے فائرنگ کروائی تھی۔

ہوائی فائرنگ کی ویڈیو سوشل میڈیا پر وائرل ہوتے ہی تھانہ صدر سانگلہ پولیس نے ملزم سکندر کو اسلحہ سمیت گرفتار کر لیا۔

ڈی پی او ننکانہ سید ندیم عباس نے ایس ایچ او تھانہ صدر سانگلہ ہل عارف باجوہ اور ہمراہی ٹیم کی کارکردگی کو سراہا ہے۔

ڈی پی او کا کہنا ہے کہ والدین اپنے بچوں کو قانون شکنی کے مرتکب بننے کی ترغیب نہ دیں۔ ہوائی فائرنگ اور اسلحہ کی نمائش میں ملوث عناصر کو کسی صورت معاف نہیں کیا جائیگا۔