امریکا کے بعد فرانس نے بھی اسرائیل کی مخالفت کردی

امریکا کے بعد فرانس نے بھی اسرائیلی وزرا کے بیانات کی مذمت کر دی۔

فرانس نے اسرائیلی وزرا کے غزہ سے فلسطینیوں کی بےدخلی کےبیانات کو ناقابل قبول قرار دیتے ہوئے کہا ہے کہ اسرائیلی وزرا کے بیانات اشتعال انگیز ہیں جس کی شدیدمذمت کرتے ہیں۔

فرانس نے اسرائیلی وزراء کی طرف سے فلسطینیوں کو غزہ سے زبردستی بے گھر کرنے اور یہودی آباد کاروں کو محصور علاقے میں واپس آنے کے لیے کیے گئے تبصروں کو ’اشتعال انگیز‘ قرار دیا ہے۔

فرانس کی وزارت خارجہ نے پیر کو بین گیویر کے بیان اور اتوار کو سموٹریچ کے بیان کے بعد ایک بیان میں کہا کہ فرانس اسرائیلی وزیر خزانہ بیزلیل سموٹرچ اور قومی سلامتی کے وزیر ایتامار بین گویر کے تبصروں کی مذمت کرتا ہے۔

ان کا کہنا تھا کہ ہم اسرائیل سے مطالبہ کرتے ہیں کہ وہ ایسے اشتعال انگیز اعلانات سے باز رہے، جو غیر ذمہ دارانہ اور کشیدگی کو ہوا دیتے ہیں۔

امریکا نے اسرائیلی وزرا کے شر انگیز بیان کے بعد دو ٹوک مؤقف میں کہا ہے کہ غزہ فلسطینی سرزمین ہے اور رہے گی۔

امریکی محکمہ خارجہ کے ترجمان میتھیو ملر نے کہا فلسطینیوں کی سرزمین کے خلاف اسرائیلی وزرا کا بیان اشتعال انگیز اور غیر ذمہ دارانہ ہے، غزہ سے بڑے پیمانے پر فلسطینیوں کی نقل مکانی نہیں ہونی چاہیے۔

واضح رہے کہ اسرائیلی وزرا نے یہودی آباد کاروں کو محصور علاقوں پر قبضے کا کہا تھا۔