ظفر وال سیکٹر سیالکوٹ ورکنگ باؤنڈری پر بھارتی فورسز نے بلا اشتعال فائرنگ کی ہے۔
بھارتی فورسز نے ظفروال سیکٹر میں کواڈکاپٹر ڈرون سے دراندازی کی کوشش کی جسے پاکستانی فورسز نے ناکام بنادیا۔
بھارتی فورسز نے کواڈ کاکپٹر کی دراندازی کی ناکامی پر پاکستانی پوستوں پر فائرنگ کی۔
پاکستانی فورسز نے بروقت کارروائی کرتے ہوئے بھارتی جارحیت کا بھرپور جواب دیا۔
واضح رہے کہ اگست میں بھی بھارتی فوج نے ایل او سی کے نکیال سیکٹر میں بلا اشتعال فائرنگ کرکے شہریوں کو نشانہ بنایا تھا، فائرنگ کے نتیجے میں کوٹلی کا 60 سالہ شہری غیاث شہید ہوگیا تھا۔
آئی ایس پی آر کا بتانا تھا کہ علاقے میں گھاس کاٹنے والی تین خواتین فائرنگ سے شدید خوف کا شکار ہوگئیں۔
ترجمان پاک فوج کا کہنا تھا کہ بھارت گزشتہ کچھ عرصے سے سیز فائر کی صریحا خلاف ورزی کررہا ہے، بھارتی مہم جوئی کا جواب اپنی مرضی کی جگہ اور وقت پر دیا جائے گا۔
آئی ایس پی آر کا کہنا تھا کہ پاکستان اپنی سرحدوں پر امن کا خواہاں ہے، شہریوں کے تحفظ کے لیے ہر ممکن اقدامات کیے جائیں گے۔
