فلسطینی اتھارٹی نے فلسطین میں پہلے سعودی سفیر کا خیر مقدم کیا ہے۔
فلسطین میں پہلے سعودی سفیر نایف السدیری فلسطینی اتھارٹی کے صدر محمود عباس کو اپنی اسناد پیش کرنے والے ہیں۔ السدیری اور ان کے ہمراہ وفد دو روزہ سرکاری دورے پر منگل کو اردن سے کراما کراسنگ کے ذریعے مقبوضہ مغربی کنارے پہنچا ہے۔
وہ فلسطینی وزیر خارجہ ریاض المالکی کے ساتھ ساتھ محمود عباس اور وزیر اعظم محمد شتیہ سے بھی ملاقات کریں گے۔
پیر کے روز، فلسطینی وزارت خارجہ نے سعودی سفیر کے دورے کا خیرمقدم کرتے ہوئے اسے ” برادرانہ تعلقات کے فروغ کے لیے ایک تاریخی سنگ میل” قرار دیا۔
فلسطینی خبر رساں ایجنسی WAFA کے مطابق سیکرٹری جنرل حسین الشیخ نے کہا، "ہم مملکت فلسطین میں مملکت سعودی عرب کے سفیر کو خوش آمدید کہتے ہیں، جو اپنی سرکاری اسناد پیش کریں گے۔”
گزشتہ اگست میں، السدیری جو اردن میں سعودی عرب کے موجودہ سفیر ہیں کو فلسطین کے لیے غیر مقیم ایلچی اور یروشلم میں قونصل جنرل مقرر کیا گیا تھا۔
ان کی اسناد کی ایک کاپی 12 اگست کو فلسطینی صدر کے سفارتی مشیر ماجدی الخالدی کو اردن کے شہر عمان میں فلسطین کے سفارت خانے میں ایک تقریب میں اردن میں فلسطین کے سفیر عطا اللہ خیری کی موجودگی میں پیش کی گئی
