نگراں وزیرداخلہ سرفراز بگٹی نے ہدایت کی ہے کہ غیر قانونی مقیم غیرملکیوں کی وطن واپسی کیلئے حکمت عملی مرتب کی جائے۔
تفصیلات کے مطابق نگران وزیر داخلہ سرفراز بگٹی کی زیر صدارت جائزہ اجلاس ہوا جس میں گفتگو کرتے ہوئے وزیرداخلہ نے کہا کہ ملک میں امن وامان کا قیام حکومت کی اولین ترجیح ہے کسی فرد یا گروہ کی تشدد پسندانہ سرگرمیوں کوبرداشت نہیں کیا جائے گا۔
انہوں نے کہا کہ پاک ایران سرحدپر 3مزید بارڈر کراسنگ کھولنے کیلئے ایکشن پلان جلد مکمل کیا جائے پولیس ، سیکیورٹی اداروں کی کارکردگی بہتر بنانے کیلئے دائرہ کار کا واضح تعین ضروری ہے سول آرمڈفورسزکی بہتری کیلئے جدید تربیت ،وسائل فراہم کریں گے جب کہ کاروبار،سرمایہ کاری کیلئےویزا درخواست گزاروں کو ہرممکن سہولت دی جائے۔
ان کا کہنا تھا کہ غیر ملکیوں کو فول پروف سکیورٹی کی فراہمی کو یقینی بنایا جائے۔ وزیر داخلہ نے غیرملکیوں کی سکیورٹی کے ضابطہ اخلاق پرعملدرآمد یقینی بنانےکی ہدایت بھی کی۔
وزیر داخلہ کی ہدایت پرنیشنل ایکشن پلان پر عملدرآمد کیلئے آئندہ ہفتے اجلاس طلب کر لیا گیا
