بھارت میں جنسی ہراسانی کے واقعات میں ہر گزرتے دن کے ساتھ اضافہ ہوتا جارہا ہے، پی ٹی ٹیچر کی جانب سے حیدرآباد کے ایک اسکول میں کم عمر طالبہ کے ساتھ غیر اخلاقی حرکت کا واقعہ پیش آیا ہے، بچی کے والدین کو جب اس بات کا علم ہوا تو انہوں نے اسکول پر دھاوا بول دیا گیا اور واقعے میں ملوث ٹیچر کی درگت بنادی۔
بین الاقوامی خبر رساں ادارے کی رپورٹ کے مطابق راجندر نگر، عطاپور کے ایک پرائیویٹ اسکول میں کم عمر لڑکی 8ویں جماعت میں زیر تعلیم ہے۔اسی اسکول کے پی ٹی ٹیچر کی جانب سے طالبہ کے ساتھ غیر اخلاقی حرکت کا واقعہ پیش آیا ہے۔
پی ٹی ٹیچر مذکورہ طالبہ کو فون پر مسلسل ہراساں کررہا تھا، جب طالبہ نے اس بات کا ذکر اپنے والدین سے کیا تو وہ فوری طور پر اسکول پہنچ گئے اور رشتہ داروں کے ساتھ مل کر اسکول میں ہنگامہ آرائی کی، جبکہ مذکورہ ٹیچر کی جم کر پٹائی کی۔
بچی کے والدین اور رشتہ داروں کی جانب سے اسکول کے پرنسپل اور دیگر اساتذہ پر بھی حملہ کیا گیا، جبکہ پی ٹی ٹیچر کو اسکول کے احاطے میں ہی پکڑ لیا گیا تھا۔
پولیس کی جانب سے مداخلت کرنے پر بچی کے والدین نے ملزم کو پولیس کے حوالے کردیا، عطاپور پولیس کے ذرائع کے مطابق واقعے کا مقدمہ درج کرکے تحقیقات کا آغاز کردیا گیا ہے۔
