تازہ ترینخبریںفن اور فنکار

صبا قمر کا غیر ملکی سے شادی کا ارادہ

حال ہی میں ریلیز ہونے والی فلم ’کملی‘ کی اداکارہ صبا قمر نے عندیہ دیا ہے کہ وہ ممکنہ طور پر غیر ملکی شخص سے شادی کریں گی اور عین ممکن ہے کہ وہ شادی کے بعد شوبز کو بھی خیرباد کہ دیں۔

صبا قمر نے 2021 کے آغاز میں بھی پاکستانی نژاد آسٹریلوی کاروباری شخص اور یوٹیوبر عظیم خان سے جلد شادی کرنے کا عندیہ دیا تھا، تاہم بعد ازاں عظیم خان پر لڑکیوں کی جانب سے جنسی ہراسانی کے الزامات سامنے آنے کے بعد اداکارہ نے ان سے تعلقات ختم کرنے کا اعلان کیا تھا۔

تاہم اب ایک سال بعد اداکارہ گزشتہ چند ہفتوں سے بار بار اپنے انٹرویوز میں شادی اور تعلقات پر بات کرتی دکھائی دیتی ہیں اور ایک ہفتہ قبل ہی انہوں نے عندیہ دیا تھا کہ ممکنہ طور پر وہ رواں برس کے اختتام تک رشتہ ازدواج میں بندھ جائیں گی۔

اب انہوں نے ایک تازہ انٹرویو میں اپنی شادی سے متعلق مزید باتیں کرتے ہوئے رشتہ ازدواج میں منسلک ہونے کے بعد شوبز چھوڑنے کا عندیہ بھی دے دیا۔

صبا قمر نے حال ہی میں صحافی ملیحہ رحمٰن کو دیے گئے انٹرویو میں اپنی فلم ’کملی‘ کے کردار سمیت آج تک ادا کیے گئے دیگر کرداروں پر بھی بات کی اور ساتھ ہی انہوں نے شادی اور ذاتی زندگی سے متعلق بھی باتیں کیں۔

اداکارہ نے ایک سوال کے جواب میں تصدیق کی کہ وہ گزشتہ کچھ عرصے سے ایک شخص کے ساتھ تعلقات میں ہیں اور ان سے تعلقات کے بعد ان کا محبت سے متعلق خیال ہی تبدیل ہوگیا۔

اداکارہ نے اس شخص سے متعلق واضح طور پر معلومات دینے سے گریز کرتے ہوئے بتایا کہ وہ غیر ملکی ہے مگر مسلمان ہے۔ صبا قمر نے یہ واضح نہیں کیا کہ جس شخص سے ان کے تعلقات ہیں اور جن سے وہ شادی کرنے کا ارادہ رکھتی ہیں، وہ پاکستانی نژاد ہے یا پیدائشی طور پر غیر ملکی شہری ہیں؟

انہوں نے یہ ارادہ بھی ظاہر کیا کہ وہ جلد شادی کرنے کا ارادہ رکھتی ہیں اور ساتھ ہی خواہش کا اظہار کیا کہ وہ چاہتی ہیں کہ وہ شادی کے بعد اپنے ہونے والے شوہر کے ساتھ فریضہ حج ادا کرنے جائیں۔

https://www.instagram.com/p/CeiJFo1MBty/?utm_source=ig_web_copy_link

جواب دیں

آپ کا ای میل ایڈریس شائع نہیں کیا جائے گا۔

Back to top button