خوبصورت ترشے ہوئے ناخن ہاتھوں کی خوبصورتی میں اضافہ کرتے ہیں، لیکن ناخنوں کی صحت کا خیال رکھنا بے حد ضروری ہے۔
ہمارے ناخنوں کو بڑھنے سے روکنے کی کئی وجوہات ہیں جس کی وجہ سے ناخن کمزور، پھیکے اور غیر صحت مند نظر آنے لگتے ہیں اور یہ ٹوٹنے لگتے ہیں۔
ناخنوں کی نشونما اور دیکھ بھال کے لیے درج ذیل عوامل پر عمل کر کے اپنی پسند کے ناخن حاصل کیے جاسکتے ہیں۔
کیوٹیکل آئل کا استعمال کریں
کوٹیکل آئل ناخنوں کو مضبوط کرنے کا سب سے آسان اور مقبول طریقہ ہے۔ یہ قدرتی اجزا سے بنایا جاتا ہے جو ناخنوں کی پرورش کرتے ہیں جبکہ ناخنوں کو ضروری ہائیڈریشن بھی فراہم کرتے ہیں، ناخنوں پر کیوٹیکل آئل استعمال کرنے سے وہ چمک اٹھیں گے۔
اومیگا 3 فیٹی ایسڈ کا استعمال کریں
اپنے ناخنوں کو مضبوط کرنے کا ایک اور طریقہ صحت مند غذا کھانا ہے، اومیگا 3 ناخنوں میں موجود خلیات کی پرورش کر کے ناخنوں کو قدرتی طور پر مضبوط کرنے کا کام کرتا ہے۔
اومیگا 3 دیگر غذائی اجزا کو جذب کرنے میں بھی مدد کرتا ہے جس کے نتیجے میں ناخن مضبوط ہوتے ہیں۔
معیاری نیل کیئر پروڈکٹس کا استعمال کریں
بہت سی خواتین اسے نظر انداز کر دیتی ہیں، لیکن کم معیار والے مصنوعات کا استعمال ناخنوں کی صحت پر منفی اثرات مرتب کرتا ہے۔
ایسے پروڈکٹس فائدہ پہنچانے سے زیادہ نقصان کا باعث بنتے ہیں، ہمیشہ اعلیٰ معیار کی نیل کیئر پروڈکٹس استعمال کریں۔
ایسی ٹون سے پاک نیل پینٹ ریموور کا انتخاب کریں اور زیادہ نیل پینٹ لگانے سے بھی پرہیز کریں۔
ناخن پر مصنوعی چیزوں کے استعمال سے پرہیز کریں
بار بار ناخنوں پر طرح طرح کے پروڈکٹ یا ٹریٹمنٹ کا استعمال کرنے سے انہیں غذائیت نہیں ملے گی اور وہ پہلے کے مقابلے میں اور کمزور ہوسکتے ہیں۔
جیل نیلز، ایکرلیک نیلز یا مصنوعی ناخن، ناخن کو مزید کمزور کرسکتے ہیں اور آخر میں وہ خراب ہوجاتے ہیں اور بعد میں ٹوٹنے لگتے ہیں۔
علاوہ ازیں ہینڈ سینی ٹائزر کا زیادہ استعمال نہ کریں کیونکہ ان میں الکوحل بہت زیادہ ہوتی ہے جو ناخنوں کو نقصان پہنچا سکتی ہے۔
ناخنوں کو باقاعدگی سے تراشیں، انہیں زیادہ لمبا نہ رکھیں۔
جب بھی ہاتھ دھوئیں اپنے ناخنوں کو صابن اور پانی سے صاف کریں۔
اپنے نیل کلپر، فائلرز، یا ناخن کی دیکھ بھال کے دیگر لوازمات کو دوسروں کے ساتھ شیئر نہ کریں۔
