بھارتی اداکارہ، ماڈل اور گلوکارہ شہناز گل نے کہا ہے کہ مجھے یہ بات سمجھ میں آگئی کہ یہ دنیا عارضی ہے، بس روحانی سفر ہی ہمارے کام آئے گا، اس کے علاوہ اور کچھ نہیں ہے۔
فلموں اور ٹیلی ویژن سمیت بگ باس ہاؤس سے شہرت حاصل کرنے والی شہناز کور گل نے بھارتی میڈیا سے گفتگو کے دوران کہا کہ روحانیت میں پہلے دلچسپی کم تھی لیکن اب اس کے بنا کچھ نہیں ہے۔
ان کا کہنا تھا کہ دراصل میری جو حقیقت ہے وہ بہت خالص ہے، مجھے روحانیت سے بہت زیادہ لگاؤ ہے۔
شہناز کا کہنا تھا کہ ہماری زندگی میں ذہنی صحت اہم ہے اور میں محسوس کرتی ہوں کہ اگر ہم خوش ہیں تو ہی سب اچھا لگتا ہے اور تب ہی ہم کام کرسکتے ہیں، لہٰذا میرا روحانی سفر ساتھ ساتھ چل رہا ہے۔
واضح رہے کہ شہناز گل بگ باس ہاؤس کے کنٹیسٹنٹ کے طور پر ابھر کر سامنے آئیں اور کافی شہرت حاصل کی اور ان کی سیزن 13 کی ایک ویڈیو بھی وائرل ہوئی جس میں وہ اس حوالے سے گفتگو کر رہی ہیں۔
گزشتہ برس اپنے قریبی دوست اور بگ باس 13 کے شریک کنٹیسٹنٹ سدھارتھ شکلا کی موت کے باعث وہ کافی اداس رہیں، جس کے بعد سے ان کا رجحان روحانیت کی جانب ہوا۔
اس حوالے سے انہوں نے کہا کہ پہلے یہ کم تھا لیکن اب اس جانب زیادہ رجحان ہوگیا ہے اور روحانیت کا علم ہی اصل چیز ہے باقی کچھ نہیں۔
