مسلم لیگ (ن )کے صدر شہباز شریف اور رہنماء احسن اقبال نے امیر جماعت اسلامی سراج الحق سے ملاقات کی جس میں اپوزیشن اتحاد کیلئے جماعت اسلامی سے تعاون طلب کر لیا۔
جماعت اسلامی کی مرکزی قیادت لیاقت بلوچ، میاں محمد اسلم و دیگر موجود تھے۔ میاں شہباز شریف اور امیر جماعت اسلامی سے ملاقات میں موجودہ ملکی و سیاسی صورتحال پر تبادلہ خیال کیا گیا ۔تحریک عدم اعتماد کے حوالے سے امیر جماعت اسلامی سے تعاون کی استدعا کی ۔
میڈیا سے بات چیت کرتے ہوئے شہباز شریف نے کہاکہ امیر جماعت اسلامی سراج الحق سے کل ملاقات کی درخواست کی تھی، سراج الحق نے مہربانی کی اور ملاقات کا وقت دیا۔ اپنی اور متحدہ اپوزیشن کی جانب سے سراج الحق سے تحریک عدم اعتماد میں ساتھ دینے کی درخواست کی ہے۔
سراج الحق نے کہاکہ شہباز شریف سعد رفیق اور مریم اورنگزیب کا مشکور ہوں کہ وہ تشریف لائے، شہباز شریف نے تحریک عدم اعتماد کے حوالے سے اپنی تجاویز شیئر کی ہیں، موجودہ حکومت ناکام ہو چکی، معیشت بیٹھ چکی ہے ۔
سراج الحق نے کہا کہ حکومت نے عوام کا جینا مشکل کر دیا ہے، جماعت اسلامی جمہوری جماعت ہے اپنی جماعت کے اجلاس میں شہباز شریف کی باتوں پر غور کریں گے۔ انہوں نے کہاکہ تحریک عدم اعتماد آئینی طریقہ کار ہے، یکسوئی سے اپنی بات قوم کے سامنے رکھیں گے، افراد کی تبدیلی بھی مسئلے کا حل نہیں جب تک نظام نہ بدلا جائے۔ انہوں نے کہا کہ عوام سے رجوع کر کے نیا مینڈیٹ لیا جانا چاہیے، شہباز شریف نے ایک حد تک ہماری تجویز سے اتفاق کیا ہے۔ انہوں نے کہا کہ تمام جماعتوں کو مل کر انتخابی اصلاحات کی طرف جانا چاہیے، انتخابی عمل پر اعتماد بحال کے بغیر انتخابات بھی بے مقصد ہیں۔
