روسی فوج چرنوبل کے جوہری پلانٹ کے علاقے پر قبضہ کرنے کی کوشش کر رہی ہے

یوکرینی صدر ولودیمر زیلنسکی نے روس پر الزام لگایا ہے کہ روسی فوج چرنوبل کے جوہری پلانٹ کے علاقے پر قبضہ کرنے کی کوشش کر رہا ہے۔

صدر زیلنسکی نے انگریزی زبان میں اپنی ٹویٹ میں لکھا: ’روسی افواج چرنوبل نیوکلیئر پاور پلانٹ پر قبضہ کرنے کی کوشش کر رہی ہیں۔ ہمارے دفاع کرنے والے اپنی جانیں قربان کر رہے ہیں تاکہ 1986 والا افسوسناک واقعہ دوبارہ نہ رونما ہو جائے۔ سویڈن کے وزیر اعظم کو اطلاع دے دی ہے۔ یہ پورے یورپ کے خلاف اعلان جنگ ہے۔‘

اس سے قبل یوکرین کے وزیر داخلہ کے مشیر انٹون ہیراشنکو نے اپنے فیس بک پر پیغام دیا کہ روسی افواج نے اس علاقے تک رسائی بیلاروس کے ذریعے حاصل کی۔

’اگر جوہری مواد کو محفوظ رکھنے والا مقام گولہ باری سے تباہ ہوا تو تابکار دھول اور مٹی نہ صرف یوکرین بلکہ بیلاروس اور یورپی یونین کے ممالک کے گھیر لے گی۔‘