تازہ ترینخبریںپاکستان سے

(ن) لیگ کا بیانیہ ہمارے حلیفوں سے ملاقات کے بعد دفن ہوگیا

وزیر خارجہ شاہ محمود قریشی نے کہا ہے کہ (ن) لیگ کا بیانیہ کل ہمارے حلیفوں سے ملاقات کے بعد دفن ہوگیا اور چوہدری برادران نے اپوزیشن کو تحریک عدم اعتماد کا ووٹ دینے کا وعدہ نہیں کیا بلکہ انکار کر دیا۔

ملتان میں میڈیا سے گفتگو کرتے ہوئے وزیر خارجہ شاہ محمود قریشی نے کہا کہ مسلم لیگ (ن) کا ہمارے حلیفوں کے پاس ووٹ مانگنے جانا (ن) لیگ کے بیانیے کی نفی ہے، جن کا پیٹ کاٹنا تھا ان کے دروازے پر کیوں جارہے ہیں۔

انہوں نے کہا کہ اپوزیشن کی صفوں میں یکسوئی نہیں ہے، مسلم لیگ (ن) کے اندر 2 دھڑے ہیں، ایک تحریک عدم اعتماد کے لیے جدوجہد کر رہا ہے اور دوسرا انتخابات کا حامی ہے۔

شاہ محمود قریشی کا کہنا تھا کہ اپوزیشن گومگوں کی شکار ہے، پاکستان پیپلز پارٹی (پی پی پی) اور (ن) لیگ میں بھی بنیادی فرق ہے، پیپلز پارٹی اس وقت تحریک عدم اعتماد لانا چاہتی ہے جبکہ مسلم لیگ (ن) انتخابات چاہتی ہے۔

ان کا کہنا تھا کہ تحریک عدم اعتماد اپوزیشن کا استحقاق ہے، تحریک عدم اعتماد کا سیاسی انداز میں مقابلہ کریں گے اور اپوزیشن کو شکست دیں گے۔

بلدیاتی انتخابات کی تیاریوں سے متعلق سوال پر ان کا کہنا تھا کہ جب انتخابات آئیں گے تو تحریک انصاف پوری تیاری کے ساتھ میدان میں اترے گی، وزیر اعظم عمران خان نے فیصلہ کیا ہے کہ وہ اس بار امیدواروں کا انتخاب خود کریں گے، علاقائی گروپنگ اور پسند ناپسند اس بار نہیں چلے گی۔

جواب دیں

آپ کا ای میل ایڈریس شائع نہیں کیا جائے گا۔

Back to top button