لتا منگیشکر کی آخری رسومات, پاکستان سمیت جنوبی ایشیائی ممالک کا خراج عقیدت پیش
’سروں کی ملکہ، آواز کی کوئل اور بلبل ہند‘ سمیت کئی ناموں سے پکاری جانے والی بھارت کی لیجنڈری گلوکارہ لتا منگیشکر کی موت کے بعد پاکستان، بنگلہ دیش، سری لنکا اور افغانستان سمیت دیگر جنوبی ایشیائی ممالک کے حکمرانوں اور اہم سیاستدانوں سمیت عوام نے بھی خراج تحسین پیش کیا۔
لتا منگیشکر 6 فروری کی صبح 92 برس کی عمر میں مداحوں سے بچھڑیں اور اسی روز شام کو سرکاری سطح پر ان کی آخری رسومات ادا کرکے ان کا ’انت یشٹی یا انتم سنسکار‘ کردیا گیا۔
’بلبل ہند‘ کی آخری رسومات ریاست مہاراشٹر کے دارالحکومت ممبئی کے شیوا جی پارک میں ادا کی گئیں اور ان کے بھائی نے انہیں مکھ اگنی دی، اس سے قبل بھارتی وزیر اعظم نریندر مودی کی موجودگی میں گلوکارہ کے اعزاز میں سلامی پیش کی گئی۔
#WATCH | State honour being given to veteran singer Lata Mangeshkar at Mumbai's Shivaji Park
(Source: DD news) pic.twitter.com/9fMvwyT9W6
— ANI (@ANI) February 6, 2022
لتا منگیشکر کو اگرچہ بھارت کی آواز کے طور پر پہچانا جاتا تھا مگر ان کی آواز کے دیوانے پورے بر صغیر اور جنوبی ایشیائی میں پائے جاتے تھے اور وہ خطے میں یکساں مقبولیت رکھتی تھیں۔
لتا منگیشکر کی وفات کے بعد جہاں پاکستانی شوبز و میوزک سے وابستہ شخصیات نے انہیں خراج تحسین پیش کیا، وہیں عام عوام اور سیاستدانوں سمیت شوبز اور صحافت سے تعلق رکھنے والی شخصیات نے بھی انہیں جملوں کی سلامی پیش کی۔
