لاہور: پاکستان کرکٹ بورڈ نیوزی لینڈ سے سیریزز کیلئے تماشائیوں کو سٹیڈیم میں داخلے کی اجازت دینے کا خواہشمند ہے۔
ذرائع کے مطابق پی سی بی کراؤڈ کی اجازت کیلئے این سی اوسی سے رابطہ کرے گا اور راولپنڈی، لاہور میں ہونے والے میچز میں تماشائیوں کو اجازت دینے کی درخواست کی جائے گی۔ پی سی بی ویکسی نیشن شدہ تماشائیوں کی اجازت کی بات کرے گا۔ ویکسی نیشن سرٹیفکیٹ والے تماشائیوں کو داخلے کی اجازت پر زور دیا جائیگا۔
پی سی بی کے مطابق نیوزی لینڈ کی ٹیم دورے کے دوران آئی سی سی مینز کرکٹ ورلڈ کپ سپر لیگ میں شامل تین ون ڈے انٹرنیشنل میچز اور پانچ ٹی ٹونٹی انٹرنیشنل میچز کھیلے گی۔ سیریز میں شامل تمام 5 ٹی ٹونٹی انٹرنیشنل میچز قذافی سٹیڈیم لاہور میں کھیلے جائیں گے۔ نیوزی لینڈ کی ٹیم ٹیسٹ سیریز کھیلنے آئندہ سال دوبارہ پاکستان آئے گی۔
