غیر مسلح ہونے کی تجویز، حماس کا عرب ممالک کو منفی میں جواب

مہر خبررساں ایجنسی کی رپورٹ کے مطابق، باخبر ذرائع نے انکشاف کیا ہے کہ بعض عرب ممالک نے فلسطینی مزاحمتی تنظیم حماس کو مکمل طور پر اسلحہ ڈالنے یا کم از کم عارضی طور پر غزہ چھوڑنے کی تجویز دی ہے تاہم حماس نے تجویز کو مکمل مسترد کردیا ہے۔

ذرائع کے مطابق اس تجویز کے بدلے میں صہیونی حکومت غزہ پر حملے روکنے پر آمادہ ہوجائے گی۔ مذکورہ عرب ممالک کے مطابق اس تجویز کا ہدف غزہ میں خونریزی اور اسرائیلی جارحیت کو روکنا ہے۔

عرب ممالک کی اس تجویز کے جواب میں حماس نے دوٹوک موقف اختیار کرتے ہوئے کہا ہے کہ مسلح مزاحمت ایک سرخ لکیر ہے جس پر کوئی بات نہیں ہو سکتی۔

حماس کا کہنا ہے کہ عرب ممالک کو حماس پر دباؤ ڈالنے کے بجائے صہیونی حکومت پر دباؤ ڈالنا چاہیے۔ علاوہ ازیں حماس کو عرب ممالک کی جانب سے یہ انتباہ بھی دیا گیا ہے کہ اگر فوری طور پر کوئی معاہدہ نہ ہوا تو امریکہ اور اسرائیل کی جانب سے اس کے رہنماؤں کو عرب و اسلامی ممالک میں قتل کرنے کی سازش کی جاسکتی ہے۔