اورنگی ٹاؤن میں سیاسی جماعت کے یوسی چیئرمین کو گولیاں مار کرقتل کردیا گیا

کراچی کے علاقے اورنگی ٹاؤن میں پاکستان پیپلزپارٹی سے تعلق رکھنے والے یونین کونسل کے چیئرمین کو مبینہ ٹارگٹڈ حملے میں گولیاں مار کر قتل کردیا گیا۔

پاکستان بازار پولیس نے بتایا کہ 32 سالہ عامر عبد الکلام ( عامر بھٹو) کو مسلح موٹر سائیکل سواروں نے بسم اللہ چوک کے قریب گولی مار کر ہلاک کیا۔

پولیس ترجمان نے بتایا کہ عامر گلشن ضیا میں اپنے دفتر/بیٹھک میں بیٹھے تھے جب مسلح موٹر سائیکل پر سوار افراد نے ان پر اندھا دھند فائرنگ کر دی اور فرار ہو گئے۔

عامر بھٹو گولیاں لگنے کے بعد شدید زخمی ہو گئے ، انہیں فوری طور پر عباسی شہید ہسپتال منتقل کیا گیا جہاں وہ دوران علاج زخموں کی تاب نہ لاتے ہوئے چل بسے۔

تفتیش کاروں نے جائے وقوعہ سے گولیوں کے چھ خول برآمد کیے ہیں۔