سونے کی فی تولہ قیمت 10 ہزار روپے اضافے کے بعد تین لاکھ 38 ہزار سے زائد ہو گئی

پاکستان میں سونے کی قیمت میں اضافے کا رجحان جاری ہے اور جمعے کے روز بھی اس میں اضافہ ریکارڈ کیا کیا جارہا ہے اور سونے کی قیمت میں 10 ہزار روپے فی تولہ اضافہ ریکارڈ کیا گیا جو ایک دن میں سونے کی قیمت میں ہونے والا سب سے بڑا اضافہ ہے۔

دس ہزار روپے کے اضافے کے بعد سونے کی قیمت تین لاکھ، 38 ہزار 800 روپے فی تولہ پر پہنچ گئی جو اس کی ملکی تاریخ میں سب سے بڑی قیمت ہے۔

گزشتہ روز سونے کی فی تولہ قیمت میں 7800 روپے فی تولہ اضافہ ریکارڈ کیا گیا تھا۔

سونے کے تاجر عبداللہ چاند کے مطابق سونے کی قیمت میں اس سے پہلے کبھی ایک دن میں اتنا بڑا اضافہ ریکارڈ نہیں کیا گیا۔

سونے کی قیمت میں ہونے والے اضافے کی وجہ عالمی مارکیٹ میں اس کی قیمت میں ہونے والا اضافہ ہے جو اس وقت 3171 ڈالر فی اونس پر موجود ہے۔

انھوں نے کہا کہ عالمی مارکیٹ میں بھی سونے کی قیمت میں ایک دن میں 100 ڈالر فی اونس کا اضافہ ریکارڈ کیا گیا۔

گولڈ شعبے کے ماہر احسن الیاس نے بی بی سی اردو کو بتایا کہ اس وقت امریکی حکومت کے اقدامات نے اس کی کمزور معیشت کو واضح کر دیا ہے جس کی وجہ سے ڈالر میں سرمایہ کاری کم ہورہی ہے اور سرمایہ کار ڈالر فروخت کر کے سونے میں سرمایہ کاری کر رہے ہیں۔

احسن الیاس نے کہا کہ سونے میں سرمایہ کاری محفوظ سمجھی جاتی ہے اور اس وقت عالمی سطح پر معاشی صورتحال اور تنازعات سرمایہ کاروں کو سونے کی خریداری کی طرف لے جارہے ہیں جس کی وجہ سے ڈیمانڈ بڑھی ہے اور اس کی قیمت میں اضافہ ہو رہا ہے جو جون میں 3500 ڈالر فی اونس تک جانے کی توقع ہے۔