گورنر پنجاب کا بلاول بھٹو زرداری اور کارکنان کے اعزاز میں افطار ڈنر

لاہور(محمد اخلاق اسلم/نیوز رپورٹر) گورنر پنجاب سردار سلیم حیدر خان نے گورنر ہائوس لاہور میں چیئرمین پاکستان پیپلز پارٹی بلاول بھٹو زرداری اورپارٹی کے سینئرعہدیداران اور کارکنان کے اعزاز میں افطار ڈنر کا اہتمام کیا۔
تقریب سے خطاب کرتے ہوئے گورنر پنجاب سردار سلیم حیدر خان نے کہا کہ پیپلزپارٹی پنجاب میں زندہ رہنے کے لئے کسی کے سہارے کی ضرورت نہیں اپنے بل بوتے پر کھڑے ہوں گے۔ انہوں نے کہا کہ پنجاب میں اپنا مقام دوبارہ حاصل کریں گے۔گورنر پنجاب نے کہا کہ پاکستان پیپلزپارٹی کا ہے اور انشا اللہ بلاول بھٹو عوام کی طاقت سے ملک کے وزیر اعظم بنیں گے۔انہوں نے کہا کہ جب سے صدر آصف علی زرداری نے مجھ پر اعتماد کیا ہے تو میری کوشش ہے کہ پارٹی ورکرز کو دل سے لگائوں اور مقام دوں۔ انہوں نے کہا کہ گورنر ہاوس کے دروازے نہ صرف پیپلز پارٹی کے ورکرز بلکہ پنجاب کے عوام کے لیے ہر وقت کھلے ہیں۔ گورنر پنجاب نے کہا کہ ان کے گورنر ہائوس میں ہوتے ہوئے پارٹی ورکرز اپنے آپ کو تنہا محسوس نہ کریں۔ گورنر پنجاب نے کہا کہ ان کی دلی خواہش ہے کہ شہیدوں کا وارث ملک کا وزیر اعظم بنے۔انہوں نے کہا کہ انہوں نے اب تک جتنی افطاریاں گورنر ہائوس میں کروائیں ہیں ان میں حکومت کا ایک روپیہ تک نہیں لگایا۔
اس موقع پر تقریب سے خطاب کرتے ہوئے چیئرمین پاکستان پیپلز پارٹی بلاول بھٹو زرداری نے کہا کہ پاکستان اس وقت دہشت گردی سمیت مختلف بحرانوں سے گزر رہا ہے۔ انہوں نے کہا کہ تمام جماعتوں کو ملک و قوم کی سلامتی پر اکٹھا ہونا پڑے گا۔ انہوں نے کہا کہ متحد پاکستان ہی دہشت گردوں کا مقابلہ کرسکتا ہے۔ چیئر مین بلاول بھٹو نے کہا کہ قومی ایشوز پر ہمیں اتفاق رائے پیدا کرنا ہوگا۔انہوں نے کہا کہ پاکستان کے عوام اس وقت غربت اور بے روزگاری کا سامنا کررہے ہیں۔ بلاول بھٹو زرداری نے کہا کہ عوام کے مسائل کا حل ترجیح ہونا چاہئے۔انہوں نے کہا کہ اپوزیشن سے مشورہ ہے کہ وہ تنگ نظری کی سیاست چھوڑ کر عوام کا سوچیں۔بلاول بھٹو زرداری نے کہا کہ اگر ہم نے ملک کو آگے لے کر جانا ہے تو ہمیں اپنے تمام تر ذاتی مفادات کو پش پست ڈالنا ہوگا تھی ہم ترقی کے راستے پر گامزن ہوسکتے ہیں۔
چیئر مین بلاول بھٹو زردار ی نے کہا کہ میں گورنر پنجاب سردار سلیم حیدر خان کو آج کی اس تقریب کے انعقاد پر دل کی گہرائیوں سے خراج تحسین پیش کرتا ہوں ۔ انہوں کہا کہ گورنر پنجاب سردار سلیم حیدر خان نے عوام کے اوپر نہیں بلکہ ان کے دلوں پر راج کرنا ہے۔ انہوں نے کہا کہ گورنر پنجاب کی انتھک کوششوں کی وجہ سے لاہور سمیت پورے صوبے میں پیپلز پارٹی اپنے کھوئے ہوئے مقام کو ضرور حاصل کرے گی۔بلاول بھٹو زرداری نے کہا کہ گورنر پنجاب کی جانب سے پاکستان پیپلز پارٹی کے ورکروں کو افطار ڈنر پر مدعو کرنا بڑے فخر کی بات ہے۔ انہوں نے کہا کہ پاکستان پیپلز پارٹی کو صوبے میں کامیاب و کامران کرنے کے لئے بھر پور طریقے سے کوششیں جاری رکھنی ہیں۔تقریب میں سابق وزیراعظم راجہ پرویز اشرف، جنرل سیکرٹری حسن مرتضی، فیصل میر، امتیاز صفدر وڑائچ سمیت پیپلز پارٹی کی قیادت سمیت میڈیا نمائندگان،پیپلز پارٹی کے کارکنان اور ورکرزکی کثیر تعداد نے شرکت کی۔