پنجاب اسمبلی کے زیر اہتمام پارلیمانی کانفرنس 6 تا 10 فروری 2025 منعقد ہوگی
پنجاب اسمبلی کے زیر اہتمام پہلی مشترکہ سی پی اے ایشیا اور ساؤتھ ایسٹ ایشیا پارلیمانی کانفرنس 6 تا 10 فروری 2025 لاہور میں منعقد ہوگی
لاہور، 6 فروری 2024 – اسپیکر پنجاب اسمبلی ملک محمد احمد خان کی مدبرانہ قیادت میں، پنجاب اسمبلی تاریخ میں پہلی بار کامن ویلتھ پارلیمنٹری ایسوسی ایشن (CPA) ایشیا اور ساؤتھ ایسٹ ایشیا ریجنز کی مشترکہ پارلیمانی کانفرنس کی میزبانی کرے گی۔ یہ تاریخی کانفرنس، جس کا عنوان "پارلیمانی حکمت عملی: جامع ترقی اور پائیدار مستقبل کے لیے” ہے، 6 سے 10 فروری 2025 تک لاہور، پاکستان میں منعقد ہوگی۔
یہ منفرد اور تاریخی نوعیت کی کانفرنس ایشیا اور ساؤتھ ایسٹ ایشیا کے پارلیمانوں کو ایک پلیٹ فارم پر اکٹھا کرے گی، جہاں خطے کو درپیش چیلنجز اور پائیدار ترقی کے حوالے سے پارلیمانی حکمت عملیوں پر تبادلہ خیال کیا جائے گا۔ یہ پہلی بار ہوگا کہ سی پی اے ایشیا اور ساؤتھ ایسٹ ایشیا ریجنز کی علیحدہ کانفرنسز کو ایک مشترکہ اجلاس کی صورت میں منعقد کیا جا رہا ہے، جو پارلیمانی سفارت کاری میں ایک اہم پیش رفت ہے۔
یہ بین الاقوامی کانفرنس خطے میں پارلیمانی تعاون کو فروغ دینے اور مختلف چیلنجز کے حل کے لیے اجتماعی حکمت عملی طے کرنے میں سنگ میل ثابت ہوگی۔ اس میں گورننس، موسمیاتی تبدیلی، ڈیجیٹل ترقی، اور سماجی ترقی جیسے اہم موضوعات پر گفتگو ہوگی۔ لاہور چارٹر (Lahore Charter) کی منظوری کے ذریعے شریک پارلیمانوں کے درمیان ایک مشترکہ عزم کو فروغ دیا جائے گا، تاکہ خطے کے پائیدار اور جامع مستقبل کو یقینی بنایا جا سکے۔
یہ کانفرنس نہ صرف پاکستان کے عالمی تشخص کو اجاگر کرے گی بلکہ پارلیمانی سفارت کاری میں پاکستان کے کلیدی کردار کو بھی نمایاں کرے گی۔ لاہور، جو اپنے تاریخی اور ثقافتی ورثے کے لیے مشہور ہے، عالمی سطح پر ایک بین الاقوامی سفارتی مرکز کے طور پر سامنے آئے گا۔
کامن ویلتھ پارلیمنٹری ایسوسی ایشن (CPA) 1911 سے فعال ہے اور 56 ممالک میں اس کی 180 شاخیں ہیں۔ پنجاب اسمبلی، جو 1954 سے اس تنظیم کا حصہ ہے، ہمیشہ سے جمہوریت، اچھی حکمرانی، اور انسانی حقوق کے فروغ کے لیے کوشاں رہی ہے۔
کانفرنس میں 100 سے زائد مندوبین شرکت کریں گے، جن میں سری لنکا، مالدیپ، برطانیہ، زیمبیا، ملائیشیا اور پاکستان سمیت مختلف ممالک کے وفود شامل ہوں گے۔ پاکستان کے سینیٹ، قومی اسمبلی، اور چاروں صوبائی اسمبلیوں کے علاوہ آزاد جموں و کشمیر اور گلگت بلتستان کی قانون ساز اسمبلیوں کے نمائندے بھی شریک ہوں گے۔
اہم اجلاس اور موضوعات:
افتتاحی اجلاس: "مشترکہ علاقائی چیلنجز کے لیے تعاون پر مبنی حکمرانی”
کلیدی سیشنز:
"جامع اور مساوی ترقی کے لیے قانون سازی”
"مقامی حکومتوں کا استحکام: موثر غیرمرکزی نظام کے لیے قانون سازی”
"ماحولیاتی تبدیلی اور پائیدار شہر”
"صاف ہوا اور ماحولیاتی تحفظ کے لیے قانون سازی”
"مصنوعی ذہانت، ڈیجیٹل تعاون، اور سوشل میڈیا کے لیے پارلیمانی اصلاحات”
"صحت اور تعلیم کے لیے قانون سازی: سماجی ترقی کے راستے”
ثقافتی تقریب: لاہور کے ثقافتی ورثے کو اجاگر کرنے کے لیے خصوصی تقریب
اختتامی اجلاس: "پائیدار ترقی کے لیے علاقائی تعاون: مستقبل کی راہ”
کانفرنس کے آخری روز "لاہور چارٹر” کی منظوری دی جائے گی، جو خطے کے ممالک کے درمیان مقامی حکمرانی کے استحکام، ماحولیاتی تحفظ، ڈیجیٹل ترقی، اور تعلیم و صحت میں اصلاحات کے لیے مشترکہ عزم کی نمائندگی کرے گا۔
اہم شخصیات اور شرکاء:
سی پی اے چیئرپرسن (زیمبیا)
سی پی اے سیکرٹری جنرل (برطانیہ)
ایشیا اور ساؤتھ ایسٹ ایشیا ریجن کے نمائندگان
برطانیہ کی ہاؤس آف کامنز کے خصوصی مہمان
پاکستان کی قومی، صوبائی، اور قانون ساز اسمبلیوں کے اراکین
ملائیشیا، سری لنکا، اور مالدیپ کے پارلیمانی وفود
یہ کانفرنس خطے کے پارلیمانوں کو ایک دوسرے کے قریب لانے اور پارلیمانی تعاون کے ذریعے مشترکہ چیلنجز کے حل میں ایک اہم کردار ادا کرے گی۔
