مخالفین بھی کہتے ہیں کہ نواز شریف کے ساتھ زیادتی ہوئی

آج مخالفین بھی کہتے ہیں کہ اس وقت نواز شریف کے ساتھ ظلم و زیادتی ہوئی: شہباز شریف
وزیر اعظم شہباز شریف نے کہا ہے کہ نواز شریف کو مسلم لیگ ن کی صدارت دوبارہ ملنا عوام کی خدمت کا صلہ ہے۔
لاہور میں مسلم لیگ ن کے جنرل کونسل اجلاس سے خطاب کرتے ہوئے ان کا کہنا تھا کہ ’میں اور یہ مجمع نواز شریف کو مبارکباد پیش کرتا ہے۔ یہ اللہ کا کرم اور آپ کی نیت نیتی، اور پاکستان کی خدمت کا صلہ ہے۔
انھوں نے کہا کہ ’جو ذمہ داری پارٹی نے مجھے دی تو آج وہ امانت پارٹی نے آپ کے حوالے کردی، میں یہاں موجود سب کو مبارکباد دیتا ہوں، آج وزیر اعلی پنجاب مریم نواز کی اہل قیادت اور نواز شریف کی نگرانی میں خدمت کر رہی ہے۔‘
شہباز شریف کا کہنا تھا کہ نواز شریف کو 2017 میں زبردستی نکالا گیا اس جرم میں انھوں نے پاکستان کی خدمت کی، اس کو ایٹمی طاقت بنایا، پاکستان کی معیشت ترقی کرنے لگی تھی۔
شہباز شریف کے مطابق ’پاکستان کے دشمنوں کو یہ بات راس نہیں آئی اور فراڈ کے زریعے نواز شریف کی خدمات کو پوری دنیا میں رسوا کرنے کی کوشش کی گئی مگر آج ان کے منہ کالے ہوگئے اور نواز شریف سرخرو ہوگئے۔‘
انھوں نے کہا کہ اس وقت نواز شریف کو جھوٹے کیس میں سزا دی گئی، اس کا کوئی جواز نہیں تھا، آج مخالفین بھی کہتے ہیں کہ اس وقت نواز شریف کے ساتھ ظلم و زیادتی ہوئی ہے۔
ان کا کہنا تھا کہ فوج نے قربانیاں دی ہیں اور بانی پی ٹی آئی ان کے خلاف زہر اگلتے ہیں۔
’میں عدلیہ سے کہتا ہوں کہ اگر پاکستان میں ترقی واپس نا آئی تو نا جج ہوں گے نا کچھ اور۔ مجھے امید ہے کہ ججز پاکستان کی خوشحالی کے لیے متفق ہیں۔‘