گیمز کے شوقین افراد کے لیے یوٹیوب نے نئی سہولت
ویسے تو یوٹیوب کو لوگ ویڈیوز اور فلمیں دیکھنے کے لیے استعمال کرتے ہیں مگر اب شوقین افراد اس پلیٹ فارم پر گیم بھی کھیل سکیں گے۔
دنیا بھر میں مقبول یوٹیوب جس سے لاکھوں لوگ روزگار بھی کما رہے ہیں، اب اسے پر گیم کھیلنے کی سہولت بھی متعارف کروادی گئی ہے۔ ایسے افراد جو یوٹیوب پر ویڈیوز دیکھنے کے بجائے گیمز کھیلنا چاہتے تھے ان کی خواہش پوری ہوگئی ہے۔
یوٹیوب پریمیئم کے صارفین مختلف آن لائن گیمز اس ویڈیو شیئرنگ سروس پر کھیل سکتے ہیں۔ پلے ایبلز نامی یہ تجرباتی فیچر سب سے پہلے ستمبر میں محدود افراد کے لیے متعارف کرایا گیا تھا۔
یہ فیچر پچھلے چند ہفتوں سے تمام پریمیئم صارفین کے لیے دستیاب ہے اور وہ دل کھول کر یہاں گیم کھیل سکتے ہیں۔
اس وقت یوٹیوب پر گیم کھیلنے کے شوقین صارفین کے لیے 37 گیمزموجود ہیں اور انھیں ڈاؤن لوڈ یا انسٹال کرنے کی ضرورت نہیں۔ صارفین انھیں موبائل ایپ یا ڈیسک ٹاپ پر کھیل سکتے ہیں۔
صارفین ان گیمز کی لائبریری کو ایکسپلور ٹیب کے پلے ایبلز سیکشن میں دیکھ سکتے ہیں۔ آغاز میں اس طرح کے فیچرز سے ماہانہ فیس ادا کرنے والے صارفین مستفید ہوتے ہیں تاہم بعد میں انھیں دیگر افراد کے لیے بھی پیش کر دیا جاتا ہے۔
کمپنی کو توقع ہے کہ اس سروس کو استعمال کرنے والے گیمز کھیل کر اپنی ممبر شپ برقرار رکھیں گے، تاہم صارفین سبسکرپشن سروس کا حصہ بننے کے لیے شاید تیار نہ ہوں۔
