آرمی چیف جنرل سید عاصم منیر کا کہنا ہے کہ غیرقانونی معاشی سرگرمیوں کیخلاف ادارے، متعلقہ محکمے پوری قوت سے کارروائیاں جاری رکھیں۔
پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف جنرل سید عاصم منیر نے لاہور کا دورہ کیا، اس موقع پر کور کمانڈر لاہور نے ان کا استقبال کیا، آرمی چیف نے صوبائی ایپکس کمیٹی کے اجلاس میں شرکت کی۔
اجلاس میں نگراں وزیر اعلیٰ پنجاب محسن نقوی بھی شریک ہوئے۔
آئی ایس پی آر کا کہنا ہے کہ آرمی چیف کو صوبے کی مجموعی سیکیورٹی صورتحال پر تفصیلی بریفنگ دی گئی، انہیں بجلی، گیس، چوری، ذخیرہ اندوزی، غیرملکی کرنسی اسمگلنگ کیخلاف کریک ڈاؤن پر بھی بریفنگ دی گئی۔
ترجمان پاک فوج کے مطابق شرکا کو اقلیتوں کے تحفظ کے لیے اقدامات، کچے میں آپریشنز کی پیشرفت سے بھی آگاہ کیا گیا، فورم نے غیرقانونی طور پر مقیم غیرملکی شہریوں کی وطن واپسی کا بھی جائزہ لیا۔
آئی ایس پی آر کا بتانا ہے کہ فورم کو خصوصی سرمایہ کاری سہولت کونسل، گرین پنجاب کے اقدامات سے بھی آگاہ کیا گیا۔
آرمی چیف نے تاریخی اقدامات کے سودمند اثرات کے لیے متعلقہ محکموں میں ہم آہنگی کی ضرورت پر زور دیا، اس موقع پر شرکا نے کہا کہ ریاستی ادارے، سرکاری محکمے اور عوام صوبے کی ترقی، خوشحالی کے لیے متحد ہیں۔
آرمی چیف کا کہنا تھا کہ غیرقانونی معاشی سرگرمیوں کیخلاف کارروائیوں سے معاشی نقصانات سے نجات مل سکے گی۔
