نیپرا نے سہ ماہی ایڈجسٹمنٹ کی مد میں بجلی مزید مہنگی کرنے کا فیصلہ کرلیا۔
جہان پاکستان کے مطابق نیپرا نے سہ ماہی ایڈجسٹمنٹ کی مد میں بجلی 3 روپے 28 پیسے مہنگی کرنے کا فیصلہ کیا ہے جس کا اطلاق کے الیکٹرک صارفین پر بھی ہوگا۔
نیپرا نے بجلی مہنگی کرنے کا اپنا فیصلہ وفاقی حکومت کو بھجوا دیا ہے، حکومت کی منظوری کے بعد اضافے کا اطلاق ہوجائے گا۔
نیپرا کے مطابق اضافے سے بجلی صارفین پر 160 ارب روپے کا اضافی بوجھ پڑے گا۔
ترجمان نیپرا کا کہنا ہے کہ اضافہ مالی سال 2022-23 کی چوتھی سہ ماہی ایڈجسٹمنٹ کی مد میں کیا گیا ہے۔
بجلی صافین کو چھ ماہ میں اضافی ادائیگیاں کرنا ہوں گی، بجلی صارفین اکتوبر 2023 تا مارچ 2024 تک ادائیگیاں کریں گے۔
واضح رہے کہ اس سے قبل نگراں وزیر توانائی محمد علی کا کہنا تھا کہ گیس کی قیمتوں میں اضافہ ناگزیر ہے ، قیمتوں میں ردوبدل کا جلد اعلان کردیں گے۔
محمد علی کا کہنا تھا کہ گیس کی قیمتوں میں اضافہ ناگزیرہے، گھروں کی گیس قیمت بڑھائیں گے اور کم آمدنی والے صارفین کےلیے گیس قیمت نہیں بڑھائیں گے۔
ان کا کہنا تھا کہ گیس کی قیمتوں کامسئلہ جلد حل کرلیں گے، جس کے بعد قیمتوں میں ردوبدل کا جلد اعلان کردیں گے،ہم آئی ایم ایف پروگرام میں ہیں، اس لئے گیس قیمت کم نہیں کر سکتے
