نگران وزیراعظم انوارالحق کاکڑ آج اقوام متحدہ کی جنرل اسمبلی سے خطاب کریں گے، جس میں وہ مقبوضہ کشمیر میں بھارتی بربریت کا مقدمہ پیش کریں گے۔
تفصیلات کے مطابق نگران وزیراعظم انوارالحق کاکڑ آج اقوام متحدہ کی جنرل اسمبلی سے خطاب کریں گے، نگران وزیراعظم اپنے خطاب میں مقبوضہ جموں وکشمیر میں بھارتی مظالم اور بربریت دنیا کے سامنے اٹھائیں گے اور افغانستان سےمتعلق معاملات پربات کریں گے۔
اس کے ساتھ انوارالحق کاکڑ افغان عبوری حکومت کےوعدوں،عالمی برادری کی ذمہ داری سمیت ترقی پذیرممالک کےمعاشی مسائل پر بھی خطاب میں بات کریں گے۔
گزشتہ روز نیویارک میں فارن پالیسی ڈائیلاگ میں گفتگو کرتے ہوئے ان کا کہنا تھا کہ فغانستان میں استحکام نہ آیاتوعالمی امن کیلئےچیلنج بن جائے گا۔
بھارت کے حوالے سے نگراں وزیراعظم نے کہا کہ مقبوضہ جموں کشمیرمیں انسانی حقوق کی پامالیوں پرتشویش ہے، بھارت کے مقبوضہ جموں کشمیرمیں غیرقانونی اقدامات نے خطے کو بند گلی میں لاکھڑا کیا ہے۔
انوار الحق کاکڑ کا مزید کہنا تھا کہ ہندوتوا کا خطرہ اب دنیا میں پھیل رہا ہے، کینیڈامیں سکھ رہنما کا قتل ہندوتوا پالیسی کی شیطانی فطرت کا عکاس ہے۔
یاد رہے گذشتہ روز نگراں وزیراعظم نے امریکا میں پاکستانی ڈاکٹرز کی تنظیم کے وفد سے ملاقات کی تھی، ملاقات میں طب کے شعبے میں پاکستانی ڈاکٹرز کی خدمات کو سراہا۔
اس کے علاوہ نگراں وزیر اعظم کی کانکنی کے شعبے میں نمایاں نام رکھنے والے ریوٹنٹوگروپ کےسربراہ جیکب شولم سے بھی ملاقات ہوئی، ریو ٹنٹو گروپ کے سی ای او نے یقین دلایا تھا کہ ان کی ٹیم پاکستان کے معدنیات اور کان کنی کے شعبے میں سرمایہ کاری کےلیے متعلقہ حکام سے رابطہ کرے گی۔
