بھارتی ریاست کیرالا میں ایک بار پھر ’نپاہ‘ وائرس پھیلنے کا انکشاف ہوا ہے، جس سے وہاں کم از کم دو افراد ہلاک ہوگئے جب کہ مذکورہ افراد سے ملنے والے دیگر لوگوں کی تلاش شروع کرکے انہیں ہسپتال داخل کرادیا گیا۔
’نپاہ‘ وائرس سے دونوں ہلاکتیں ضلع کوزی کوڈ میں ہوئیں، جہاں ایک سال قبل بھی مذکورہ وائرس پھیلا تھا اور متعدد اموات ہوئی تھیں۔
ریاست کیرالا میں ستمبر 2021 میں بھی ’نپاہ‘ وائرس پھیلا تھا اور حیران کن طور پر مذکورہ ضلع میں ہی اس سے اموات ہوئی تھیں، اس سے قبل بھی مذکورہ ریاست میں یہی وائرس پھیل چکا تھا۔ یہ وائرس جانوروں سے انسانوں میں پھیلتا ہے اور یہ خطرناک وائرس پہلی بار 1998 میں ملائیشیا کے جزائر نما علاقوں میں چمگادڑوں اور بعد ازاں سوئروں میں تشخیص ہوا تھا۔ مذکورہ وائرس ملائیشیا کے علاقے ’نپاہ‘ میں پہلی بار سامنے آیا، جس وجہ سے اس کا نام بھی یہی رکھا گیا اور جلد ہی مذکورہ وائرس وہاں کے دیگر علاقوں کے جانوروں میں پھیل گیا۔ اس کی عام علامات میں شدید بخار، سر میں درد، سر میں سوزش، گلے میں سوزش، کھانسی، سانس لینے میں مشکلات، جسم میں درد، تھکاوٹ اور بے چینی شامل ہیں۔
