کمپنی کو ایک بسکٹ لاکھوں روپے کا پڑ گیا، منفرد عدالتی فیصلہ

عدالت نے اپنی نوعیت کا منفرد اور تاریخی فیصلہ سناتے ہوئے پیکٹ سے ایک بسکٹ کم نکلنے پر کمپنی کو متاثرہ صارف کو لاکھوں روپے جرمانہ ادا کرنے کا حکم دیا ہے۔

انڈین میڈیا کے مطابق اپنی نوعیت کا یہ انوکھا فیصلہ بھارتی ریاست تامل ناڈو کی صارف عدالت (کنزیومر کورٹ) نے سنایا ہے جس نے ایک شہری کی جانب سے بھارت کی مشہور فوڈ کمپنی آئی ٹی سی فوڈ کمپنی کے خلاف دائر درخواست کی سماعت کرتے ہوئے کمپنی کو حکم دیا کہ وہ متاثرہ صارف کو ایک لاکھ (پاکستانی 3 لاکھ سے زائد) ہرجانہ ادا کرے۔

رپورٹ کے مطابق تامل ناڈو میں پی دلی بابو نامی شخص نے کنزیومر کورٹ میں انڈیا کی مشہور فوڈ کمپنی آئی ٹی سی فوڈز لمیٹڈ کے خلاف شکایت کی تھی کہ اُس کے بسکٹ کے برینڈ ’سن فِیسٹ میری لائٹ‘ کے پیکٹ میں 16 کے بجائے 15 بسکٹ تھے۔

شکایت میں دِلی بابو نے کمپنی کے خلاف 100 کروڑ روپے کے ہرجانے کا مطالبہ کیا تھا اور یہ بھی الزام عائد کیا تھا کہ کمپنی ناجائز طریقے سے کاروبار کر رہی اور گاہکوں کو ناقص سروس فراہم کر رہی ہے۔

مذکورہ شکایت پر عدالت نے فوڈ کمپنی کو نہ صرف ایک لاکھ روپے ہرجانہ بلکہ مقدمے کے اخراجات کی مد میں مزید 10 ہزار روپے بھی ادا کرنے کا حکم دیا ہے۔

فوڈ کمپنی نے عدالت میں موقف موقف پیش کیا کہ پیکٹ میں بسکٹ تعداد کے بجائے وزن کے مطابق پیک کیے جاتے ہیں تاہم عدالت نے کمپنی کے موقف کو مسترد کر دیا۔ صرف یہ ہی نہیں بلکہ عدالت نے کمپنی کو اس مخصوص بیچ نمبر کے بسکٹ بھی بیچنے سے منع کر دیا ہے جس میں کپمنی نے ایک پیکٹ میں 16 بسکٹ بیچنے کا وعدہ کیا ہوا ہے۔