پاکستان کے 76ویں یومِ آزادی کی خوشی میں دنیا کے سب سے بڑے سرچ انجن گوگل نے اپنا ڈوڈل تبدیل کردیا ہے۔
تفصیلات کے مطابق گوگل دنیا بھر میں مختلف ثقافتی اور سماجی ایونٹس کے موقع پر دلچسپ ڈوڈلز تیار کرتا رہتا ہے، پاکستان کی آزادی کے 76 سال مکمل ہونے پر بھی ایک نیا ڈوڈل سامنے آیا ہے۔
آج کے ڈوڈل آرٹ ورک میں دانتوں والی انڈس ڈولفن کو دکھایا گیا ہے جو پاکستان میں دریائے سندھ میں پائی جاتی ہے، اسے دریائے سندھ کی ڈولفن کہا جاتا ہے۔
انڈس ڈولفن کی یہ نسل ان دنوں خطرے سے دوچار ہے، جسے اردو اور سندھی میں بھلن بھی کہا جاتا ہے، دریائے سندھ میں پائی جانے والی ڈولفن کی یہ نسل جسے مقامی طور پر بلھن کہا جاتا ہے جبکہ اس کو عرف عام میں نابینا ڈولفن بھی کہا جاتا ہے۔
جینیاتی طور پر یہ قسم نابینا نہیں ہوتی بلکہ ایک اندازے کے مطابق دریاؤں میں بڑھنے والی آلودگی اس کے نابینا ہونے کی بڑی وجہ ہے۔
خیال رہے کہ گوگل 2011 سے پاکستان کے یوم آزادی پر ڈوڈل بنا رہا ہے، سب سے پہلے اس نے چاند ستاروں اور مینار پاکستان سے مزین سبز رنگ کے ڈوڈل کے ذریعے مبارکباد دینے کا سلسلہ شروع کیا تھا۔
واضح رہے کہ سرچ انجن مارکیٹ میں گوگل کا شیئر 86فیصد سے بھی زائد ہے اور پاکستان سمیت دنیا بھر میں انٹرنیٹ پر کسی بھی قسم کی معلومات کی تلاش کیلئے گوگل کو ترجیح دی جاتی ہے۔
انٹرنیٹ پر گوگل کے بعد بڑے سرچ انجنز کی فہرست میں بنگ، بائیڈو، یاہو، یانڈیکس اور آسک کے نام شامل ہیں تاہم دنیا بھر کی توجہ کا مرکز بننے والے گوگل میں انڈیکس کی گئی معلومات سب سے زیادہ ہیں۔
