تحریک انصاف نے پولیس کے کریک ڈاؤن کے پیش نظر پی ٹی آئی کے تمام ورکرز کو محفوظ مقامات پر منتقل ہونے کی ہدایت کردی۔
تفصیلات کے مطابق پولیس کی جانب سے کریک ڈاؤن کے بعد تحریک انصاف نےتمام کارکنوں اور سپورٹرزکو الرٹ جاری کردیا گیا۔
ذرائع پی ٹی آئی نے کہا ہے کہ پی ٹی آئی قائدین،کارکنان کےگھروں پرچھاپےمارےجارہےہیں، پولیس نے تقریباً ایک ہزار لوگوں کی لسٹیں 25 مئی کی طرزپربنائی ہیں، پی ٹی آئی کےتمام ورکرزاحتیاط کریں اورمحفوظ مقامات پررہیں۔
واضح رہے کہ اسلام آباد اور لاہور میں اتوار کی رات گئے پولیس کریک ڈاؤن کے دوران پاکستان تحریک انصاف کے متعدد رہنماؤں کو گرفتار کیا گیا تھا۔
اسلام آباد اور لاہور پولیس نے پی ٹی آئی رہنماؤں کے گھروں اور ڈیروں پر چھاپے مارے۔
اسلام آباد پولیس نے پاکستان تحریک انصاف (پی ٹی آئی) کے سینیٹر شبلی فراز، شفقت محمود ، مسرت چیمہ، انجم تنولی، نعمان گجر، راجہ خرم نواز، علی محمد خان اور دیگر کی رہائش گاہوں پر چھاپے مارے۔
پولیس نے پی ٹی آئی رہنماؤں میاں اسلم اقبال، میاں افضل اقبال اور میاں امجد اقبال کے ڈیروں پر بھی چھاپے مارے۔
اس کے علاوہ پی ٹی آئی رہنما چوہدری عمر طالب کی رہائش گاہ پر چھاپے دوران پولیس نے طالب کے بھائی چوہدری عمیر اور ایک ملازم حافظ کو گرفتار کر لیا۔
علاوہ ازیں پولیس نے آئندہ انتخابات میں پی ٹی آئی کے امیدواروں کے گھروں پر بھی چھاپے مارے۔
