وزیر خارجہ بلاول بھٹو کا کہنا ہے کہ عمران خان سمجھتے ہیں ان پر ملک کا کوئی بھی قانون لاگو نہیں، باربارقانون کی خلاف ورزی پر جواب دینا ہوگا۔
تفصیلات کے مطابق وزیر خارجہ بلاول بھٹو نے امریکی ٹی وی شو ‘دی ڈیلی شو’ کو انٹرویو دیتے ہوئے پی ٹی آئی چیئرمین عمران خان کے حوالے سے کہا کہ عمران خان سمجھتے ہیں ان پر ملک کا کوئی بھی قانون لاگو نہیں، عمرن خان نےباربارقانون کی خلاف ورزی کی جس کا جواب دینا ہوگا۔
بلاول بھٹو کا کہنا تھا کہ عمران خان کا مسئلہ ان کی انا کا ہے عدالتیں انھیں بلاتی ہیں کہ آئیں اور اپنے خلاف کیس لڑیں لیکن انھوں نے عدالتی نظام کو مذاق بنایا ہوا ہے۔
وزیر خارجہ نے کہا کہ اگر عمران عدالت جائیں گے تو پھر گرفتاری کا بھی خوف نہیں ہوگا لیکن وہ پیش نہ ہوکر عدالتی احکامات کی خلاف ورزی کررہے ہیں۔
ان کا مزید کہنا تھا کہ عدالت نے پولیس کو انھیں پیش کرنے کی ہدایت کی تو انھوں نے اپنے لوگوں اور کارکنان کو پولیس سے مقابلے کا کہا، اس سیاسی گڑبڑ سے سڑک پر جو کچھ ہورہا ہے اس سے عوام متاثر ہورہے ہیں۔
