رضا ربانی اور مشاہد سید کو ان کی پارٹیاں فارغ کر دیں گی ، سینیٹر دنیش کمار کی پیشگوئی

بلوچستان عوامی پارٹی کے سینیٹر دنیش کمار نے کہا ہے کہ پیشگوئی کرتا ہوں رضا ربانی اور مشاہد سید کو ان کی پارٹیاں فارغ کر دیں گی۔

سینیٹ اجلاس میں گفتگو کرتے ہوئے سینیٹر دنیش کمار نے کہا کہ مشاہد سید اور رضا ربانی نے سچائی بیان کی ہے۔ آج خوشی ہوئی کہ ہمارے لوگوں نے سچائی بیان کی۔

واضح رہے کہ سینیٹ اجلاس میں مسلم لیگ ن کے رہنما اور سینیٹر مشاہد حسین سید نے کہا تھا کہ 5 ارب ڈالر کا افغان جہاد لڑا گیا ، آج اس کے نتائج ہمارے سامنے ہیں ، لنگڑی لولی حکومت سے بہتر ہے کہ حکومت چھوڑ کر الیکشن کرایا جائے۔

مشاہد حسین سید نے کہا کہ جنرل ضیاء کو گالیاں تو دی جاتی ہیں مگر ان کی پالیسیوں کو فالو کیا جاتا ہے ، جنرل ضیاء نے کہا تھا الیکشن اس وقت ہوں گے جب نتائج مثبت ہوں گے ، کرسی کی جنگ پاکستان کو تباہ کر دے گی۔

پیپلز پارٹی کے سینیٹر رضا ربانی نے ٹی ٹی پی سے متعلق حکومت کی پالیسی کو پشاور سانحے کا ذمہ دار قرار دیتے ہوئے کہا کہ ٹی ٹی پی کی پاکستان میں بحالی کے فیصلے کی تحقیقات ہونی چاہیے۔

رضا ربانی نے کہا کہ ٹی ٹی پی سے جب جنگ بند ہوئی اور مذاکرات ہوئے تو پارلیمان کو اعتماد میں نہیں لیا گیا۔