18 اگست 2019
تازہ ترین
یمن میں ہوٹل پرفضائی حملہ،60افراد ہلاک

یمن میں ہوٹل پرفضائی حملہ،60افراد ہلاک

یمن کے دارالحکومت صنعا میں ایک ہوٹل پر فضائی حملے کے نتیجے میں 60 افراد ہلاک ہو گئے۔ عرب میڈیا کی رپورٹ کے مطابق فضائی حملہ صنعا کے قصبے ارہاب میں واقع ایک ہوٹل پر کیا گیا جہاں تقریباً 100 کے قریب لوگ موجود تھے۔ حملے کے مقام پر موجود ڈاکٹر علی الرقمی نے بتایا کہ اب تک 35 لاشیں نکالی جا چکی ہیں جبکہ ہلاکتوں میں مزید اضافے کا بھی خدشہ ہے۔ حملے کے مقام سے 10 کلو میٹر دور واقع اسپتال کے سربراہ فہد مرحب کا کہنا ہے کہ ہوٹل پر حملے کے نتیجے میں کوئی بھی زندہ نہیں بچا ہے۔ عینی شاہدین اور مقامی حکام نے امریکی خبر رساں ایجنسی کو بتایا کہ ہلاکتوں کی تعداد 60 تک پہنچ چکی ہے اور ہلاک ہونے والوں میں زیادہ تر حوثی باغی شامل ہیں۔ حوثی باغیوں کے ٹی وی چینل نے دعویٰ کیا ہے کہ یہ فضائی حملہ عرب عسکری اتحاد کی جانب سے کیا گیا ہے اور اس میں یمنی حکومت کی معاونت بھی شامل تھی تاہم اس حوالے سے عرب اتحاد کی جانب سے کوئی بیان سامنے نہیں آیا۔ یہ اطلاعات بھی سامنے آئی ہیں کہ منگل اور بدھ کی درمیانی شب صنعا پر مختلف مقامات پر 25 فضائی حملے کیے گئے جن میں ہوٹل پر حملہ بھی شامل تھا جہاں سب سے زیادہ ہلاکتیں ہوئیں۔ واضح رہے کہ دارالحکومت صنعا پر حوثی باغیوں کا قبضہ ہے، ستمبر 2014 میں حوثی باغیوں نے صنعا پر حملہ کر کے بین الاقوامی طور پر تسلیم شدہ صدر منصور ہادی کی حکومت کو ختم کرنے کی کوشش کی تھی۔ اس کے جواب میں سعودی عرب کی سربراہی میں عرب عسکری اتحاد نے مارچ 2015 میں یمن کے خلاف فوجی کارروائی کا آغاز کر دیا تھا۔ اقوام متحدہ کی رپورٹ کے مطابق فروری 2014 سے اب تک یمن میں 10 ہزار سے زائد افراد ہلاک ہو چکے ہیں۔


مزید خبریں

عوامی سروے

سوال: کیا پی ٹی آئی انتخابات سے قبل کیے گئے وعدے پورے کر پائے گی؟