22 اگست 2019
تازہ ترین
گاڑیوں کے وائپر دیں گے اب سیلاب کی خبر

گاڑیوں کے وائپر دیں گے اب سیلاب کی خبر

اب کاروں پر گرنے والے بارش کے پانی اور وائپر کی صفائی کی شرح سے برسات کی ٹھیک پیمائش اور شہری سیلاب (اربن فلڈ) کی پیشگوئی کی جاسکتی ہے۔ یہ دلچسپ تجربہ امریکی شہر این آربر میں کیا گیا جس میں کاروں کی سکرین سے پانی صاف کرنے والے وائپروں پر لگے سینسر اور ڈیش بورڈ پر رکھے کیمرے استعمال کرکے برسات کا ڈیٹا حاصل کیا گیا۔ تجرباتی طور پر 70 گاڑیوں میں یہ نظام لگایا گیا۔ اس ساری کوشش کا مقصد یہ ہے کہ سڑکوں پر چلنے والے کاروں سے حقیقی وقت میں بارش کی مقدار کا درست ڈیٹا حاصل کیا جائے۔ اس طرح کسی شہر میں سیلاب کے خطرے کی پیشگوئی میں مدد ملے گی کیونکہ شہری سیلاب سے املاک، انفراسٹرکچر اور ماحول کو شدید نقصان پہنچتا ہے۔ اسی بنا پر یونیورسٹی آف مشی گن کے پروفیسر برانکو کارکیز اور ان کے ساتھیوں نے یہ سمارٹ سسٹم تیار کیا ۔ گاڑیوں میں لگے خود کار سینسر اور کیمرے سے ملنے والا ڈیٹا بارش کی وہ معلومات دے سکتا ہے جو اس سے قبل کبھی ممکن نہیں تھا۔ یہ موسمیاتی ریڈار سے بھی موثر انداز میں ہماری معلومات میں اضافہ کرکے اس ضمن میں معلومات کے خلا کو پر کر سکتا ہے۔ اس کی وجہ یہ ہے کہ موسمیاتی ریڈار ایک میل کے چوتھائی حصے کی خبر دیتا ہے اور وائپر ہر سیکنڈ پر بعد چند میٹر تک میں ہونے والی بارش کی خبر دے سکتے ہیں۔ ہم جانتے ہیں کہ پوری دنیا میں موسم کا مزاج بگڑ رہا ہے اور بارشوں کی شدت میں اضافہ ہورہا ہے۔ اس طرح وائپر سینسر اور دیگر آلات کے ذریعے ہر کار کو ایک موسمیاتی سٹیشن میں بدلا جاسکتا ہے۔ صرف پاکستان کے بالائی علاقوں میں ہی بارشوں کی شدت میں اضافہ ہوتا جارہا ہے اس ضمن میں جلد یا بدیر ایسے آلات کی ضرورت بڑھتی جائے گی۔ اگر یہ سینسر شہر بھر میں ہر جگہ لگائے جائیں تو یہ ایک مہنگا نسخہ ہوگا لیکن گاڑیوں پر لگانے میں اس کا خرچ کم ہوجاتا ہے اور یوں کئی شہر آپس میں بارشوں کے ڈیٹا نیٹ ورک سے جوڑے جاسکتے ہیں۔


مزید خبریں

عوامی سروے

سوال: کیا پی ٹی آئی انتخابات سے قبل کیے گئے وعدے پورے کر پائے گی؟